— मनिराम खनाल

पुरानाले देश बिगारे भन्दै नयाँ आएका
छैनन् यी सांसद, मन्त्री हुन लायक।।३।।
प्रश्न गर्छन् जनताले, विकास खै त मन्त्रीज्यू?
भन्छन् मन्त्री, तिम्रो भोट फिर्ता लैजाऊ।।३।।

रुघा लाग्दा मन्त्रीज्यूले हेलिकप्टर मगाउँछन्
स्वास्थ्य, शिक्षा महँगो छ, गरिब मराउँछन्।।३।।
खानलाउन अभाव, ग्यासको अभाव गराउने
कसरी हो यिनले देशमा विकास गराउने?।।३।।

रातदिन काम गरेर हो देशलाई अघि बढाउने
गरिब देशले दुई दिन किन छुट्टी मनाउने?।।३।।
एमसीसी र संघीयता खै त खारेज गरेको?
थाहा छ कि छैन, देश ऋणमा डुबेको।।३।।

खल्तीमा पैसा नहुनेले उपचार पाउनेछ
गरिबलाई भन्थ्यौ, शिक्षा फ्री हुनेछ।।३।।
सर्वसुलभ फ्री होइन, झनै कर लगायौ
गरिबलाई आत्महत्या गर्ने गरायौ।।३।।

सहकारी भ्रष्टका ती मुद्दा फिर्ता गरायौ
सुशासनको कुरा गरी लज्जित बनायौ।।३।।
विदेशका गल्लीभरि स्टिकर टाँसेर
सत्ता पाउन भरम पार्यौ, जनता ढाँटेर।।३।।

बारबारालाई नागरिकता दिने देशद्रोही हो
देशमा आगो लगाउनेलाई हाल्ने खोरै हो।।३।।
अमेरिकाको कठपुतली भनौँ सबले खुलेर
कहिले पनि हुन्न विकास, देश पोलेर।।५।।