बागलुङबजार । नेकपा (मसाल) का महामन्त्री मोहनविक्रम सिंह वर्तमान सरकार असफल बन्दै गएको धारणा व्यक्त गर्नुभएको छ ।
राष्ट्रिय जनमोर्चा बागलुङको आयोजनामा २०८१ पुस २६ गते आयोजना गरेको प्रशिक्षण कार्यक्रममा मन्तव्य राख्दै उहाँले सो धारणा व्यक्त गर्नुभएको हो ।
‘केपी ओली नेतृत्वको सरकार लामो समय टिक्ने स्थिति छैन’ उहाँले भन्नुभयो– ‘असफल बन्दै गएकोले सरकारको आयु लामो हुने स्थिति छैन ।’
उहाँले नेपाली काङ्ग्रेस सम्मिलित ओली नेतृत्वको सरकार पूर्ण रूपमा असफल बन्दै गइरहेको बताउनुभयो ।
ओली नेतृत्वको सरकारले महँगी, भ्रष्टाचार, अनियमितता रोक्न पूर्ण रूपमा असफल भएको बताउँदै उहाँले त्यही कारणले नै नेपालमा सरकार फेरबदल भइरहने बताउनुभयो ।
उहाँले अहिलेको सरकारले सहकारी ठगीमा संलग्नलाई समेत विभेद गरेको धारणा राख्नुभयो ।
‘अहिलेको सरकारले अन्य दलका सहकारी ठगीमा लागेकालाई समात्यो तर काङ्ग्रेस र एमालेमा आबद्ध भएकालाई संरक्षण गर्यो’ उहाँले भन्नुभयो– ‘यसले गर्दा नागरिकहरू समस्यामा परेका छन ।’
उहाँले सहकारी ठगलाई गरेको विभेदबारे आम नागरिकले बुझ्न नसकेको बताउनुभयो ।
कार्यक्रममा राजमो केन्द्रीय सल्लाहकार तथा बागलुङ समन्वय समितिका प्रमुख अमर थापालेले राष्ट्रिय जनमोर्चाले चैतको अन्तिम साता राजधानीकेन्द्रित सङ्घीयता विरुद्ध तीव्र आन्दोलन गर्ने तयारी गरेको स्मरण गराउनुभयो ।
सङ्घीयताको कारण मुलुक आर्थिक रूपमा टाट पल्टिँदै गएको, अराजकता बढेको, घुसकमिसनलगायतका गतिविधि बढेको, विदेशीसँगको साँठगाँठमा युवाहरूलाई विदेशल पलायन गराएको, रोजगार सृजना गर्न नसकेको भन्दै चैत २४ गतेदेखि ३० गतेसम्म सघीयता विरोधी आन्दोलन गर्न लागिएको उहाँको दाबी थियो ।
उहाँले सङ्घीयता विरुद्धको आन्दोलनलाई सफल पार्न लाग्नुपर्ने जोड दिनुभयो ।
उहाँले मुलुकको समृद्धि र उन्नतिका लागि देशबाट सङ्घीयतालाई खारेज गरिनुपर्नेमा जोड दिए ।
कार्यक्रममा राजमो नेता कृष्ण अधिकारी, वरिष्ठ अधिवक्ता काजीगाउँले श्रेष्ठले पनि मन्तव्य व्यक्त गर्नुभएको थियो ।
जैमिनी नगरपालिकाका नगरप्रमुख नरबहादुर पुनले सङ्घीयता विरुद्ध बागलुङ जिल्लास्तरको कार्यक्रम प्रस्तुत गर्नुभएको थियो ।
राजमो बागलुङका अध्यक्ष तिलक थापाको अध्यक्षतामा सम्पन्न कार्यक्रमको सञ्चालन राजमो बागलुङका सचिव भीमलाल पोखरेलले र स्वागत जिल्ला सचिवालय सदस्य लक्ष्मी बासकोटाले गर्नुभएको थियो ।
