काठमाडौँ । प्रधानमन्त्री बालेन्द्र शाहमा शक्तिकेन्द्रित गर्ने महत्त्वाकाङ्क्षा बढ्न थालेको हो ? यतिखेर राजनीतिक वृत्तमा यस खालको आशङ्का उत्पन्न भएको छ ।
अर्थमन्त्री र अर्थमन्त्रालयको अधिकारलाई खारेज गराएसँगै परराष्ट्र मामिलामा उनको यस्तै अर्को महत्त्वाकाङ्क्षा खुलेको हो ।
यस सन्दर्भमा प्रधानमन्त्री बालेन्द्रले परराष्ट्र मन्त्रालयलाई कुनै जानकारी नदिई आफ्ना प्रमुख सल्लाहकार कुमार ब्यञ्जनकार (बेन) लाई दिल्ली पठाएर भारतका राष्ट्रिय सुरक्षा सल्लाहकार अजित डोभलसँग भेटवार्ता गराएका छन् ।
जुलाई महिनाको पहिलो साता भएको भनिएको कुमार बेन र अजित डोभलको भेटवार्ताबारे परराष्ट्र मन्त्रालयलाई अहिलेसम्म औपचारिक जानकारी दिइएको छैन । प्रधानमन्त्री वा उनका सल्लाहकार बेनले यसबारे परराष्ट्र मन्त्रालयसँग केही कुरा गरेका छैनन् ।
परराष्ट्रका एक उच्च अधिकारीले उक्त भेटवार्ता भएको पुष्टि गरे पनि छलफलको एजेन्डाबारे मन्त्रालयलाई कुनै जानकारी नदिइएको बताए ।
प्रधानमन्त्री, मन्त्री वा सरकारका कुनै पनि उच्च प्रतिनिधिले विदेशी नेता वा प्रतिनिधिसँग गोप्य नभेट्ने बालेन सरकारको अघोषित नीति र अहिलेसम्मको अभ्यास विपरीत प्रधानमन्त्रीका प्रमुख सल्लाहकार बेनले डोभलसँग एकल भेट गरे ।
प्रधानमन्त्री बालेनका दूतका रूपमा बेनले डोभलसँग गरेको भेटमा उनीहरूबिच के कुरा भयो भन्ने नेपाल सरकारको कुनै पनि रेकर्डमा रहने छैन, किनभने त्यहाँ परराष्ट्र मन्त्रालयका कुनै पनि प्रतिनिधि उपस्थित थिएनन् ।
कुमार बेनको गुपचुप दिल्ली भ्रमणबारे सत्तारूढ रास्वपाका सभापति रवि लामिछाने भने जानकार रहेको पाइएको छ ।
पार्टीका केही निकट नेताले यो भेटवार्ताबारे जिज्ञासा राख्दा सभापति लामिछानेले बेनले आफूलाई जानकारी गराएरै दिल्ली गएका हुन् भन्ने जबाफ दिएको बताइएको छ ।
पार्टीसित सरकारको सन्तुलन ?
रास्वपा सभापति लामिछाने आफ्ना दुई निकट नेता विपिन आचार्य र दीपक बोहोरालाई लिएर जेठ तेस्रो साता दिल्ली भ्रमणमा गएका थिए । सत्तारूढ भाजपाको निम्तोमा दिल्ली गएका लामिछानेले प्रधानमन्त्री मोदी, विदेशमन्त्री एस जयशङ्करदेखि राष्ट्रिय सुरक्षा सल्लाहकार अजित डोभललगायत उच्चस्तरीय नेतासँग भेटवार्ता गरेका थिए ।
लामिछानेले भारतबाट पाएको भव्य स्वागतका कारण दिल्लीको संस्थापन पक्षसँगको सम्पर्कमा आफू पछाडि पर्ने संशय प्रधानमन्त्रीलाई उत्पन्न भएको कि भन्ने आशङ्का गरिएको छ । यही संशयका कारण उनले परराष्ट्रलाई बाइपास गरेर आफ्ना विश्वासपात्र बेनलाई कूटनीतिक भेटघाटमा सक्रिय गराएको हुन सक्ने अनुमान गरिएको छ ।
बेनलाई भारत पठाएर प्रधानमन्त्री बालेन्द्रले दिल्लीसँग रास्वपामार्फत होइन, सिधै आफूले सम्पर्क स्थापित गर्न चाहेको सन्देश दिएको चर्चा राजनीतिक वृत्तमा छ ।
पार्टीभित्रको शक्ति सन्तुलन ठिक ठाउँमा राख्न पनि यो सम्पर्क उपयोगी हुने प्रधानमन्त्रीको टिमले सोचेको हुन सक्ने रास्वपाका एक नेता बताउँछन् । यसरी भारतसँगको सम्बन्धमा प्रधानमन्त्री बालेन्द्र र रास्वपा पार्टीबिच प्रतिस्पर्धाजस्तो देखिन थालेको छ ।
भारतमा आशङ्का
पछिल्लो समय भारतीय सञ्चारमाध्यममा बालेन सरकार विरुद्ध नेपालमा जनआक्रोश बढ्दै गएको, उनको राजीनामा मागिएको र यो सरकार सात महिनाभन्दा बढी नटिक्ने खालका समाचार लगातार आइरहेका छन् । भाजपा निकट अखबार र च्यानलमा समेत यस्तो समाचार आएका छन् ।
आफैमा अपुष्ट ती समाचार कतै भारतीय संस्थापन पक्षले दिएको सङ्केत त होइन भन्ने आशङ्काले पनि प्रधानमन्त्री बालेन र उनको टिम कूटनीतिक रूपमा आफै सक्रिय हुन थालेको एक रास्वपा नेताको अनुमान छ ।
