काठमाडौँ । वामपन्थी नेता आनन्द शर्माले अहिलेको सरकारलाई ढाल्नु भनेको अन्तत: भारतले चाहेको सरकार बनाउन भएको बताउनुभएको छ ।

अन्तर्राििष्ट्रय नेपाली एकता समाजले २०८० असार १ गते आयोजना गरेको भर्चुअल कार्यक्रममा प्रशिक्षण दिँदै उहाँले यस्तो अभिव्यक्ति दिनुभएको हो ।

‘हामी सबैलाई थाहा छ, अहिले संसद्को शक्ति सन्तुलनको आधारमा जम्मा दुई प्रकारका सरकार बन्न सक्छन्’ उहाँले भन्नुभयो– ‘एउटा अहिले बनेको सरकार, जो अहिलेसम्म गणतन्त्र र धर्म निरपेक्षताको पक्षमा उभिएको छ† अर्को त्यो सरकार, जो एमाले, राप्रपा, रास्वपासहितको बन्छ, त्यो प्रतिगमनको पक्षमा उभिन्छ ।’

उहाँले भन्नुभयो– ‘यो आम रूपमा थाहा भएको विषय हो, एमाले, राप्रपा, रास्वपासहितको सरकारलाई भारतीय साम्राज्यवादको समर्थन रहन्छ ।’

नेता शर्माले दोस्रो प्रकारको प्रतिगामी सरकार बन्नु भनेको देशमा प्रतिगमनलाई निम्त्याउनु भएको बताउनुभयो ।

उहाँले भन्नुभयो– ‘यस खालको विशिष्ट परिस्थितिमा हामीले यो सरकारलाई समर्थन गरेका हौँ ।’

‘तर त्यसको अर्थ यो सरकारले गरेका गलत कामको पनि समर्थन गर्नुपर्छ होइन’ वामपन्थी नेता शर्माले भन्नुभयो– ‘यदि सरकारका गलत कामको पनि समर्थन गर्ने भए त हामी सरकारमा सामेल भइहाल्थ्यौँ नि ।’

क्रान्तिकारी रूपान्तरणका लागि तीन अभियान
प्रशिक्षणको क्रममा नेकपा (मसाल) को पार्टीस्तरमा र जनस्तरमा क्रान्तिकारी रूपान्तरणका लागि एक बर्से तीन अभियान सुरु गरिएको बताउनुभयो ।

‘तीन अभियानको दुईओटा उद्देश्य छ’ उहाँले भन्नुभयो– ‘एउटा जनस्तरमा पार्टीको भूमिका र छवि प्रभावकारी र बनाउने, अर्को, पार्टीलाई क्रान्तिकारी भूमिकामा उभ्याउने ।’

‘जनताको माझमा कम्युनिस्टको बारेमा भ्रम छ । हँसियाहथौँडा बोकेका जस्ता पार्टी पनि कम्युनिस्ट हुन् भन्ने छ । त्यसो होइन, क्रान्तिकारी कम्युनिस्ट पार्टी यस्तो हुन्छ भनेर जनतालाई बताउने एउटा तरिका हो’ नेता शर्माले यी दुई भूमिकाको सङ्क्षेपमा चर्चा गर्दै भन्नुभयो– ‘अर्को पार्टीको नीतिमा दृढतापूर्वक उभिनु, घोषित पार्टीलाइनको पक्षमा एकमता स्प्रिट कागम गर्नु ।’

उहाँले आगामी २०८१ वैशाखभित्र यस्तै क्रान्तिकारी रूपान्तरणसहितको पार्टी बनाउन तीन अभियान सुरु गरिएको बताउनुभयो ।

‘अरू नामका कम्युनिस्ट पार्टीभन्दा हामी क्रान्तिकारी र अनुशासित छौँ’ उहाँले भन्नुभयो– ‘तर कम्युनिस्ट पार्टी जस्तो हुनुपर्दथ्यो, त्यस्तो छैन । हामीले त्यस्तो कम्युनिस्ट पार्टी बनाउने हो ।’

उहाँले क्रान्तिकारी कम्युनिस्ट कार्यकर्ता अर्को ग्रहबाट नआएर हामीमध्ये बाटै तयार हुने धारणा पनि राख्नुभयो ।