काठमाडौं । लुम्बिनी र गण्डकी प्रदेशबाट नेकपा एमाले नेतृत्वको सरकार बहिर्गमित भएको छ । दुवै प्रदेशमा बिहीबार नेपाली कांग्रेसले सत्ता सम्हालेको छ ।
तत्कालिन एमाले–माओवादी गठबन्धनबाट एमालेको भागमा परेका यी दुवै प्रदेश सत्ता गठबन्धन परिवर्तन भएसँगै कांग्रेसले आफ्नो भागमा पारेको छ ।
एमालेले लगभग साढे ३ महिना प्रदेश सरकार चलाएको गण्डकी र लुम्बिनी प्रदेशको मुख्यमन्त्री कांग्रेसले आफ्नो पोल्टामा पारेको हो। बिहीबार लुम्बिनीमा डिल्लीबहादुर चौधरी र गण्डकीमा सुरेन्द्रराज पाण्डे मुख्यमन्त्री नियुक्त भएका छन् ।
०७९ पुस २७ गते लुम्बिनी र पुस २५ गते गण्डकीमा नेकपा एमाले नेतृत्वमा सरकार गठन भएको थियो।
संविधानको धारा १६८ को उपधारा २ बमोजिम मुख्यमन्त्री नियुक्त भएका लुम्बिनीका मुख्यमन्त्री लिला गिरी राष्ट्रपतिको निर्वाचनमा केन्द्रीय समीकरण परिवर्तनसँगै सत्ता साझेदार दलहरूले चैत १२ गते समर्थन फिर्ता लिएपछि अल्पमतमा परेका थिए।
विश्वासको मत पाउन नसकेर सरकार ढलेपछि मुख्यमन्त्री गिरीले प्रदेश प्रमुखसमक्ष धारा १६८ को उपधारा ३ बमोजिम सरकार गठन हुनुपर्ने दाबी प्रस्तुत गरेका थिए।
यस्तै, विश्वासको मत पाउन नसकेपछि गत वैशाख ९ गते नेकपा एमालेका खगराज अधिकारी नेतृत्वको सरकार ढलेको थियो। अधिकारी नेतृत्वको सरकार ढलेसँगै गण्डकीमा नेपाली कांग्रेसका सुरेन्द्रराज पाण्डे बिहीबार नै मुख्यमन्त्रीमा नियुक्त भएका छन्।
दुवै प्रदेशका मुख्यमन्त्रीले शुक्रबार शपथ लिने कार्यक्रम रहेको छ।
