काठमाडौं । ज्यान मुद्दामा ‘फरार अभियुक्त’ को सूचीमा रहेका सांसद लक्ष्मी महतो प्रतिनिधि सभामा उपस्थित भएपछि नेपाली कांग्रेसका सांसदले प्रश्न उठाएका छन् ।
एमाले सांसद महतोमाथि २०७२ सालमा भएको मधेश आन्दोलनका क्रममा सशस्त्र प्रहरीका असई थमन विकको हत्या गरेको अभियोग छ । उनी अझै फरार अभियुक्तको सूचीमा छन् ।
गृहमन्त्री रवि लामिछानेले उनलाई पक्राउ गर्ने बताएपनि बैठकमा भने सँगै बसेका छन् ।
नेपाली कांग्रेसका सांसद रामहरी खतिवडाले हत्यामा अभियोग चलेका सांसद पनि संसद बैठकमा भएको भएको भन्दै सभामुख निर्वाचनमा भाग लिन पाउने वा नपाउनेबारे निर्णय गर्न माग गरे।
‘सभामुखमा निर्वाचन चलिरहँदा हत्याको अभियोग लागिरहेका सांसद पनि यहीँ हुनुहुन्छ भन्ने सुन्नमा आएको छ’, बिहीबार प्रतिनिधिसभा बैठकमा बोल्दै खतिवडाले भने, ‘म गृहमन्त्रीज्यूलाई अनुरोध गर्न चाहन्छु, हामी उहाँ यहाँ हुनुहुन्छ वा हुँदैन भन्ने चिन्दैनौं। यदी हुनुहुन्छ भने, उहाँको मतदान प्रक्रियामा भाग लिन पाउने नपाउने भन्ने निर्णय गरेर मात्र सभा सञ्चालन गरियोस् भन्ने माग गर्न चाहन्छु। ’
मधेशवादी दलमा रहेर राजनीति गर्दै आएका महतो गएको निर्वाचनको मुखमा एमाले प्रवेश गरी महोत्तरी १ बाट निर्वाचित भएका थिए।उनलाई उच्च अदालतले थुनामा राख्न आदेश दिएको थियो।
