काठमाडौं । नेकपा (माओवादी केन्द्र) का अध्यक्ष पुष्पकमल दाहाल प्रचण्डले आफू छिट्टै प्रधानमन्त्री बन्ने बताएका छन् ।

बुधबार कास्कीको अन्नपूर्ण गाउँपालिका–१ स्थित महेन्द्र आधारभूत विद्यालयको हीरक जयन्तीको आज समापन समारोहमा उनले आफू देशको नेतृत्व गर्ने ठाउँमा पुग्न लागेको बताए ।

दाहालको जन्मस्थल र प्रारम्भिक शिक्षा हासिल गरेको सो विद्यालयको कार्यक्रममा उनले भने, ‘अब मसँग धेरै वर्ष समय छैन । यहाँहरूको आशीर्वाद, माया र शुभकामनाले काम गर्यो भने म छिट्टै देशको नेतृत्व गर्ने ठाउँमा पुग्दैछु ।’

निर्वाचन परिणाम सार्वजनिक भएसँगै प्रमुख दलहरु सरकार गठनबारे छलफलमा लागिरहेका बेला दाहालको यो भनाई आएको हो ।

निर्वाचनमा तेस्रो स्थानमा रहेको माओवादीले दुई ठूला दल नेपाली कांग्रेस र नेकपा (एमाले) सँग सत्ता साझेदारीबारे बेग्लाबेग्लै छलफल गरिरहेको छ ।