बागलुङ । राष्ट्रिय जनमोर्चा बागलुङको दुई दिने प्रशिक्षण भेला सकिएको छ । फागुन २० र २१ गते बागलुङ बजारमा सञ्चालित प्रशिक्षण कार्यक्रम स्थानीय निर्वाचन सम्बन्धी विभिन्न निर्णय गर्दै सम्पन्न भएको छ ।
प्रशिक्षण भेलाको समापन कार्यक्रममा बोल्दै राजमो महासचिव मनोज भट्टले राष्ट्रियता र जनजीविकाको मुद्दा माथि पटक पटक कुठाराघात भइरहेको बताउँदै यस्ता शक्तिलाई पराजित नगरीकन राष्ट्रियतालाई बचाउन सकिँदैन भन्नुभयो ।
यस्तो परिस्थितिमा राष्ट्रिय जनमोर्चाका कार्यकर्ताको भूमिका अत्यन्तै महत्त्वपूर्ण हुने भएकोले सबै कार्यकर्ताहरु लाई सक्रिय र जुझारुपूर्वक लाग्न आग्रह गर्नु भयो ।
कार्यक्रममा राष्ट्रिय जनमोर्चा केन्द्रीय सदस्य तथा जिल्ला समन्वय समिति बागलुङका प्रमुख राजेन्द्र ढुङगाना, प्रगतिशील पत्रकार संघका केन्द्रीय सदस्य तारा प्रशाद शर्मा, अखिल नेपाल बुद्धिजीवी संघका केन्द्रीय सदस्य धन बहादुर कुँवर, अखिल नेपाल महिला संघ बागलुङका अध्यक्ष तथा बरेङ गाउँपालिका उपाध्यक्ष दिल कुमारी पुन, सहभागीको तर्फबाट प्रगति बुढा, रुद्रा केसी, अमर खत्री लगायतले मन्तव्य राख्नु भएको थियो ।
प्रशिक्षण भेलामा महासचिव मनोज भट्ट, केन्द्रीय सदस्य तथा गण्डकी प्रदेश सह ईन्चार्ज गौरीश्वर पाण्डे, राष्ट्रिय जनमोर्चा केन्द्रीय सदस्य तथा जिल्ला समन्वय समिति बागलुङका प्रमुख राजेन्द्र ढुङगाना, जिल्ला अध्यक्ष अमर थापाले विभिन्न बिषयमा प्रशिक्षण दिनु भएको थियो ।
भेलाले अमर थापाको संयोजकत्वमा ९ सदस्यीय जिल्ला निर्वाचन परिचालन समिति, तिलक थापाको संयोजकत्वमा १७ जनाको सचिवालय रहेको १५सय २५ सदस्यीय निर्वाचन प्रचारप्रसार समिति, धर्म कुँवरको संयोजकत्वमा ९ सदस्यीय आर्थिक समिति र भीमसेन वनको संयोजकत्वमा १३ सदस्यीय सचिवालय रहेको स्वंयसेवक परिचालन समिति चयन गर्नुका साथै चैत महिना भरीमा पालिका तथा वडास्तरीय भेला सम्पन्न गर्ने निर्णय गरेको छ ।
कार्यक्रम राष्ट्रिय जनमोर्चा बागलुङका अध्यक्ष अमर थापाको अध्यक्षता, सचिव भीमलाल पोखरेलको सञ्चालनमा सम्पन्न भएको थियो ।
