काठमाडौं । नेकपा (मसाल) लगायत विभिन्न २२ राजनीतिक दल तथा संगठनहरुले अमेरिकी परियोजना मिलेनियम च्यालेन्ज कर्पोरेसन (एमसीसी) संसदको कार्यसूची बन्नै नदिने रणानीति लिएका छन् । २२ दलले संसद बैठक बस्ने पुस १८ गते पनि एमसीसी विरुद्धको प्रदर्शनलाई जारी राख्ने भएका छन् ।
शुक्रबार संयुक्त वक्तव्य प्रकाशित गरी २२ राजनीतिक दल तथा संगठनहरुले संसद बैठक बस्ने दिन पुस १८ गते दबाबस्वरुप माइतीघर मण्डलामा प्रदर्शन गर्ने जनाएका छन् ।
२२ दलीय कार्यगत एकताका तर्फबाट सीपी गजुरेलले प्रेशित गर्नुभएको वक्तव्यमा ‘नेपालका देशभक्त शक्तिहरु र नेपाली जनताको निरन्तर विरोध एवम् संघर्षका कारणा एमसीसी परियोजना अधिकारी र नेपालका सरकारबीच गरिएको एमसीसी सम्झौता संसदबाट अनुमोदन गर्ने योजनाले आजसम्म मूर्तरुप लिन नसकेको’ उल्लेख गरिएको छ ।
एमसीसी सम्झौता खारेजीको माग गर्दै नेकपा (मसाल), नेकपा (क्रान्तिकारी माओवादी, नेकपा (माले) नेपाल कम्युनिष्ट पार्टी, राष्ट्रिय जनमोर्चा लगायत दलहरुले एकल वा संयुक्त रुपमा पनि संघर्ष गर्दै आइरहेका छन् ।
