काठमाडौं । धनुषामा बस दुर्घटना भएको छ । सडकबाट तल खसेको बसमा आगलागी हुँदा यात्रुका सामान जलेर नष्ट भएको छ । दुर्घटनामा १२ जना यात्रु घाइते भएका छन् ।
बुधबार बिहान करिब ८ बजेतिर ना ६ ख ७१०२ नम्बरको बस अनियन्त्रित भइ सडकबाट खस्दा दुर्घटना भएको हो । दाङबाट बिराटनगरतर्फ जाँदै गरेको बस पूर्वपश्चिम राजमार्गअन्तर्गत धनुषाको धनुषाधाम नगरपालिका–६ मालटोलस्थित दुर्घटना हुँदा बसमा आफैँ आगलागी भएको प्रहरीले जनाएको छ ।
दुर्घटनालगत्तै बसमा आगलागी हुँदा पुरै भाग जलेर नष्ट भएको छ । प्रहरीका अनुसार घाइते मध्ये १० जनाको स्थानीय स्वास्थ्य उपचार केन्द्रमा र दुई जनाको लालगढस्थित मोडेल अस्पतालमा उपचार भइरहेको छ । बस पल्टिने क्रममा तेल टंयाकी फुट्न गइ बसमा आगो लागेको हुनसक्ने प्रहरीको प्रारम्भिक अनुमान छ ।
बसमा लागेको आगो ढल्केवरस्थित दंगा नियन्त्रण गणका सशस्त्र प्रहरी र इलाका प्रहरी कार्यालय ढल्केवरले बरुण यन्त्रको सहयोगमा नियन्त्रण लिइएको छ।
नारायणगढमा बस नहरमा खस्यो
यता, चितवनस्थित नारायणगढमा ४५ जना यात्रु सवार बस दुर्घटना भएको छ । भैलो खेलेको पैसाले सौराहा घुम्न रिजर्भमा आएको भे २ ख २८३६ नम्बरको यात्रुबाहक बस बुधबार बिहान पूर्व–पश्चिम राजमार्ग अन्तर्गत लायन्सचोकमा रहेको नहरमा खसेको हो ।
सडकमा गुडिरहेको म्याजिक बस र अटोरिक्सालाई ठक्कर दिएर अनियन्त्रित भएको बस नहरमा खसेको हो । दुर्घटनामा परेर बसका चालक विनोद शर्मा सामान्य घाइते भएका छन् । अन्य यात्रु भने सकुशल रहेका छन् ।
बस सहचालकले चलाएको प्रहरीले जनाएको छ । प्रहरीका अनुसार सहचालक लठ्ठिएको अवस्थामा फेला परेकाले उनले मादक पदार्थ सेवन गरेको अनुमान गरिएको छ । दुर्घटनाबारे प्रहरीले अनुसन्धान गरिरहेको छ ।
