काठमाडौं । राष्ट्रिय जनमोर्चाका नाममा प्रदेश २ मा हालै गरिएको कथित भेलालाई त्यहाँका राजमो जिल्ला समिति र नेता कार्यकर्ताहरुले अस्वीकार गरेका छन् ।

प्रदेश २ अन्तर्गत राष्ट्रिय जनमोर्चाका जिल्ला समितिहरुले फुटपरस्त गतिविधि नगर्न चेतावनी नै दिएका छन् भने कथित समितिमा राखिएका नेता कार्यकर्ताहरुले धमाधम विज्ञप्ति निकाल्दै फुटपरस्त गतिविधिप्रति आफूहरुको सरोकार नरहेको स्पष्ट पारेका छन् ।

कथित प्रदेश समितिमा राखिएका ज्ञानु साह, हरिकिशोर महतो, रामबाबु शाह, सुजित झालगायत नेता कार्यकर्ताले अवैध भेला र समितिसँग आफूहरुको कुनै सरोकार नरहेको स्पष्ट पार्नुभएको छ ।

यस्तै, राष्ट्रिय जनमोर्चा बारा र पर्साले पनि छुट्टाछुट्टै विज्ञप्ति प्रकाशित गरी फुटपरस्त गतिविधिमा संलग्न नहुने कार्यकर्ता तथा शुभचिन्तकलाई सचेत गराएका छन् ।

राजमो पर्साका अध्यक्ष नेत्रप्रसाद पौडेलले जारी गर्नुभएको विज्ञप्तिमा भनिएको छ, ‘मिति २०७८/५/२७ मा केही अराजक र फुटपरस्तहरुले गरेको भेला अवैधानिक छ । त्यो राष्ट्रिय जनमोर्चालाई फुटाउने षड्यन्त्र स्वरुप भएको छ । त्यसको भ्रममा नपर्न हामीले सबैसँग अनुरोध गर्दछौँ । अहिले गणतन्त्र, राष्ट्रियता, धर्म निरपेक्षता गम्भीर संकटमा भएको बेला राष्ट्रिय जनमोर्चा झन बलियो बनाउनु पर्ने राष्ट्रिय आवश्यकता छ । यो स्थितिमा राष्ट्रिय जनमोर्चा फुटाउन खोज्नुमा गम्भीर षड्यन्त्र हुन सक्दछ । त्यसले देश, जनता र राष्ट्रिय जनमोर्चाको हित गर्दैन । सबै सतर्क हुनु पर्ने आवश्यकता छ ।’

यस्तै, राजमो बाराको तर्फबाट उपाध्यक्ष बालकृष्ण आचार्य र सचिव जीवनकुमार भट्टराईले पनि संयुक्त विज्ञप्ति प्रकाशित गरी ‘भेलामा अनुपस्थित, असहमत कामरेडहरुलाई नाम राखी बदनाम गर्ने तथा कैयौं साथीहरुलाई भ्रममा पारी प्रचार गर्ने कार्य कुनै सभ्य व्यक्तिले गर्ने कार्य नभै पार्टीभित्र फुटपरस्त क्रियाकलाप चलाईरहेका सिमित तत्वहरुको पर्दाफास हुने निश्चित भएपछि हतास मानसिकताले गरिएको उक्त हर्कतबाट सचेत रहन र समयमै आफ्नो सम्बन्धित कमिटीमा सम्पर्कमा रहन’ अपिल गरिएको छ ।

यस्तै, कथित समितिमा राखिएका राजमो रौतहटका अध्यक्ष हरिकिशोर महतोले यसअघि नै विज्ञप्ति प्रकाशित गरी फुटपरस्त तत्वहरुसँग आफ्नो कुनै सरोकार नरहेको स्पष्ट पारिसक्नुभएको छ ।

यसैगरी राजमो सर्लाहीका अध्यक्ष नवराज पौडेलले जारी गरेको विज्ञप्तिमा पनि फुटपरस्त तत्वहरुको भ्रममा नपर्न अपिल गरिएको छ । राजमो प्रदेश २ का अध्यक्ष काजिलाल वाइवा अवैध तरिकाले गरिएको कथित भेला र त्यस कार्यमा संलग्न व्यक्तिहरुलाई कारबाही गरिएको पनि स्पष्ट पार्नुभएको छ ।

यो पनिः

प्रदेश २ मा गरिएको कथित भेला अवैध : राजमो

प्रदेश २ मा फुटपरस्त गतिविधिमा संलग्न तीन जनालाई राजमाेले गर्‍यो कारबाही

फुटपरस्त गतिविधि नगर्न राजमो रौतहटका अध्यक्ष महतोको चेतावनी

प्रदेश नं. २ को कथित भेला अवैध र फुटपरस्त भएको राजमो प्रदेश र जिल्लाहरूको स्पष्टोक्ति