काठमाडौँ । नेकपा (मसाल) का महामन्त्री मोहनविक्रम सिंहले सिद्धान्तप्रति जोड दिने नीतिकै कारण मसालका कार्यकर्ता अरू राजनीतिक दलका नेता/कार्यकर्ताभन्दा फरक रहेको दाबी गर्नुभएको छ ।
राष्ट्रिय जनमोर्चाले २०८३ साउन ११ गते आयोजना गरेको पार्टीस्कुलको बाइसौँ सेसनको उद्घाटन सत्रमा मन्तव्य राख्दै उहाँले सो दाबी गर्नुभएको हो ।
‘हामीले सैद्धान्तिक विषयमा जोड दिने गरेका छौँ । त्यस क्रममा पार्टीस्कुलको यो बाइसौँ सेसन हो’ उहाँले भन्नुभयो– ‘प्रशिक्षणमा जोड दिने यस्तो नीतिकै कारण हाम्रो पार्टीको चरित्र अरूको भन्दा फरक छ । हाम्रा कार्यकर्ता अरू दलका नेता/कार्यकर्ताभन्दा फरक छन् ।’
कम्युनिस्ट पार्टीका सदस्य चेतनास्तर र व्यवहारमा जनताभन्दा माथि उठेको हुनुपर्नेमा आफूहरूले जोड दिने गरेको महामन्त्री सिंहले बताउनुभयो ।
उहाँले भन्नुभयो– ‘कम्युनिस्ट पार्टीका नेता/कार्यकर्ता आमजनताभन्दा उच्चस्तरको चेतनाबाट लैस हुनुपर्दछ । उनीहरूको व्यवहार जनताको भन्दा अग्रगामी हुनुपर्दछ ।’
मन्तव्यको क्रममा उहाँले कम्युनिस्ट पार्टीका कार्यकर्ता आगोको झिल्काजस्तो हुनुपर्ने पनि बताउनुभयो ।
‘आगोको झिल्को सानो हुन्छ तर त्यसले पूरै जङ्गलमा डढेलो लगाउन सक्छ’ उहाँले भन्नुभयो– ‘कम्युनिस्ट पार्टीको कार्यकर्ता आगोको झिल्काझैँ हुनुपर्दछ । हामीले हाम्रो पार्टीका नेता/कार्यकर्ता त्यस्तै हुनुपर्नेमा जोड दिन्छौँ ।’
सिद्धान्त वा नीतिमा जोड दिने नीतिकै कारण आफूहरू साङ्गठनिक रूपमा सानो भए पनि राजनीतिक चरित्रको दृष्टिकोणबाट आफूहरू अब्वल रहेको उहाँले स्पष्ट पार्नुभयो ।
जेनजी आन्दोलनपछि अन्य राजनीतिक पार्टीमा धेरै उथलपुथल भए पनि मसाल वा राजमोका कार्यकर्तामा त्यस प्रकारको असर नपर्नुका पछाडि आफूहरूको यही कार्यशैलीले काम गरेको उहाँको भनाइ थियो ।
माओत्सेतुङले ज्वारभाटाका विरुद्ध सङ्घर्ष गर्ने शिक्षा दिएको स्पष्ट पार्दैै उहाँले अप्ठ्यारो परिस्थितिमा पनि दृढतापूर्वक उभिन सक्नु नै कम्युनिस्ट पार्टीका सदस्यको चरित्र भएको बताउनुभयो ।
‘माओका अनुसार बगिरहेको पानीमा पातपतिङ्गर सजिलैसँग बग्छन् तर कम्युनिस्ट पार्टीका कार्यकर्ता पानीको धारको विरुद्ध वा ज्वारभाटाको विरुद्ध जान सक्नुपर्दछ’ उहाँले भन्नुभयो– ‘हामीले हाम्रो पार्टीका कार्यकर्तालाई यस्तै प्रकारको चरित्रद्वारा लैस बनाउन चाहान्छौँ ।’
पार्टीस्कुलबाट प्रशिक्षित भएका कार्यकर्ताले मसालको राजनीतिक गतिविधिलाई अघि बढाउन महत्त्वपूर्ण योगदान पुगेको महामन्त्री सिंहको भनाइ थियो ।
