काबुल । तालिबान समूहले अलकायदा प्रमुख ओसामाबिन लादेनको सेप्टेम्बर ११, २००१ मा भएका आतङ्कवादी हमलामा संलग्न भएको कुनै प्रमाण नभएको बताएको छ ।
अफगानिस्तानमा आफ्नो अघिल्लो शासनका क्रममा केही वर्षसम्म ओसामाबिन लादेनलाई सुरक्षित आवास प्रदान गरेको तालिबान समूहले सेप्टेम्बर ११ हमलापछि लादेनलाई अमेरिकालाई हस्तान्तरण गर्न अस्वीकार गरेको थियो ।
वासिङटन पोस्टका अनुसार “तालिबान प्रवक्ता जाबिहुल्लाह मुजाहिदले एनबिसी समाचारलाई बुधबारको एक अन्तर्वार्ता भनेका छन्– ‘जब ओसामाबिन लादेन अमेरिकीका लागि मुद्दा बने उनी अफगानिस्तानमा थिए ।’
लादेन सेप्टेम्बर ११ को आक्रमणमा संलग्न भएको कुनै प्रमाण नभएको दाबी गर्दै उनले थपे– ‘यद्यपि अहिले हामीले अफगान भूमि कसैका विरुद्ध प्रयोग हुने छैन भनेर प्रतिज्ञा गरेका छौं ।’
२००१ मा बिन लादेनको योजनामा वल्र्ड ट्रेड सेन्टरका टावर र पेन्टागनमा भएको आक्रमणपछि राष्ट्रपति जर्ज डब्लु बुसले तालिबान समूहसँग लादेनलाई हस्तान्तरण गर्न आग्रह गर्नुभएको थियो । आग्रहलाई अस्वीकार गर्दा तत्कालीन अमेरिकी राष्ट्रपति बुसले अमेरिकी हवाइ हमलाको अभियान सुरु गरेका थिए । अफगान नर्दन एलायन्सको स्थल सेनासँगसँगै मिलेर इस्लामवादी शासनलाई ध्वस्त पारेको वाशिंगटन पोस्टले समाचारमा लेखेको छ ।
ओसामाबिन लादेन विश्वव्यापी आतङ्ककारी समूह अलकायदाका प्रमुख र २००१ मा संयुक्त राज्य अमेरिकामा भएको सेप्टेम्बर ११ आतङ्ककारी हमलाका प्रमुख योजनाकार रहेको मानिन्छ ।
उनी २०११ मा ग्यारेसन सहर अबोटाबादमा अमेरिकी नौसैनिक सिलद्वारा परिचालन गरेको सैन्य अभियानका क्रममा मारिएका थिए । तालिबानले अफगानिस्तान आफ्नो कब्जामा लिएपछि अफगान भूमि आतङ्ककारी उत्पादन केन्द्र बन्ने चेतावनी केही सैन्यविद्हरूले बताएका छन् ।
गत वर्ष दोहामा हस्ताक्षर गरिएको अमेरिका–तालिबान सम्झौतानुसार तालिबानले अलकायदासँगको सम्बन्धलाई तोड्ने प्रतिज्ञा गरेको छ । २००१ देखि यो समूह निकै कमजोर भए तापनि यसका लडाकु अफगानिस्तानमै रहेको विश्वास गरिएको छ ।
गत महिना संयुक्त राष्ट्र सङ्घले दायस र अलकायदाजस्ता आतङ्ककारी समूहको खतरा अफगानिस्तानका धेरै स्थानमा विस्तार भइरहेको चेतावनी दिएको थियो र शान्तिप्रक्रियासँग सम्बन्धित काम अनिश्चित र थप बिग्रने खतरामा रहेको बताएको थियो । यसले यस क्षेत्रको नै सुरक्षा स्थिति कमजोर बन्ने राष्ट्र सङ्घको बुझाइ थियो । (रासस/एएनआई)
