काठमाडौं । नेपाल विद्युत प्राधिकरणका कार्यकारी निर्देशक कुलमान घिसिङले आफ्नो नाममा फेक एकाउन्ट खोलेर सामाजिक सञ्जालमा हल्ला फैलाइएको बताउनुभएको छ ।

घिसिङका नाममा खोलिएका फेक ट्विटर अकाउन्टबाट प्राधिकरणमा उहाँको पुनर्नियुक्तिबारे समाचार भाइरल बनाइएको थियो भने सामाजिक सञ्जालमा बधाईको ओइरो लागेको थियो ।

बुधबार बिहान आफ्नो फेसबुक अकाउन्टमार्फत घिसिङले आफ्नाबारे गलत सूचना प्रवाह गरिएको भन्दै यसबाहेक आफ्नो अर्को आधिकारिक अकाउन्ट नभएको जानकारी दिनुभएको छ ।

कुलमानलाई मन्त्रिपरिषद बैठकले दोस्रो कार्यकालका लागि नेपाल विद्युत प्राधिकरणको कार्यकारी निर्देशकमा पुनर्नियुक्ति गरिएको समाचार भाइरल भइरहँदा मन्त्रिपरिषदमा यससम्बन्धी कुनै प्रस्ताव नै नलगिएको उर्जा जलस्रोता तथा सिंचाईं मन्त्री वर्षमान पुनले बताउनुभएको थियो ।