घोराही। राष्ट्रिय जनमोर्चा जिल्ला समिति दाङ देउखुरीले आगामी मंसिर १५ गतेदेखि पुस मसान्तसम्म पहिलो चरणको संगठनात्मक अभियान सञ्चालन गर्ने निर्णय गरेको छ।
जिल्ला समिति अध्यक्ष गणेशप्रसाद आचार्यको अध्यक्षतामा २०८३ मंसिर ५ गते घोराहीमा सम्पन्न बैठकले राजनीतिक अन्योलता र भ्रमका विरुद्ध विचार, सुशासन र रूपान्तरणका लागि ‘संगठनात्मक पुनर्गठन तथा राजनीतिक पुनर्ताजगी’ अभियान सञ्चालन गर्ने निर्णय गरेको हो। उक्त अभियानलाई छोटकरीमा ‘सापुरापु’ अभियान नाम दिइएको छ।
अभियानअन्तर्गत राष्ट्रिय जनमोर्चाको साधारण सदस्यता वितरण तथा नवीकरण, स्थानीय संगठन गठन तथा पुनर्गठन, प्रशिक्षण, छलफल र अन्तरक्रियालगायतका कार्यक्रम सञ्चालन गरिने जनाइएको छ। आवश्यक ठानेमा स्थानीय तहले जिल्ला समितिको समन्वयमा पालिका सम्मेलनसमेत गर्न सक्ने बैठकले निर्णय गरेको छ।
यसैगरी, बैठकले जिल्लाभित्रका विभिन्न सार्वजनिक सरोकारका विषयमा गम्भीर ध्यानाकर्षण गराएको छ। विशेषगरी घोराही–तुलसीपुर चारलेन सडक निर्माणमा भइरहेको ढिलासुस्ती, घोराही–मुरकट्टी सडकखण्डको दुरवस्था तथा उक्त क्षेत्रका नागरिकले न्यूनतम मानव अधिकारसमेत उपभोग गर्न नपाएको अवस्थाप्रति बैठकले चिन्ता व्यक्त गरेको छ। सडकको दुरवस्थाका कारण यात्रु तथा पैदलयात्रीले भोग्नुपरेको समस्यालाई तत्काल सम्बोधन गर्नुपर्नेमा जोड दिइएको छ।
त्यस्तै, एमसीसीको लगानीमा निर्माण भइरहेको धानखोला–लमही सडकखण्डअन्तर्गत भालुवाङ–लमही क्षेत्रमा दुई लेन मात्र निर्माण गर्ने विषयले चारलेन सडक बनाउनुपर्ने आवश्यकतामा अवरोध सिर्जना गरेको विषय पनि बैठकमा उठाइएको छ। घना बस्ती र प्रदेश राजधानीसमेत रहेको उक्त क्षेत्रमा चारलेन सडक निर्माण हुनुपर्ने आवश्यकताप्रति बैठकले ध्यानाकर्षण गराएको छ।
बैठकले हुलाकी राजमार्ग निर्माण कार्यमा भइरहेको ढिलासुस्ती तथा स्वास्थ्य बिमा गरेका बिरामीले उपचारका क्रममा अस्पतालहरूबाट भोग्नुपरेको झन्झटिलो प्रक्रियाप्रति समेत असन्तुष्टि जनाएको छ।
बैठकले उल्लिखित सबै समस्याको तत्काल सुधार तथा समाधानका लागि सरकार र सम्बन्धित सरोकारवाला निकायको गम्भीर ध्यानाकर्षण गराउने निर्णय गरेको राष्ट्रिय जनमोर्चा जिल्ला समिति दाङ देउखुरीले जनाएको छ।