तिलक राना – हैदराबाद, १५ नोभेम्बर २०२६।
भारतमा नेपालीहरूका समस्या दिनप्रतिदिन बढ्दै गइरहेको र उनीहरूको हकहित तथा अधिकारको संरक्षणका लागि मूल प्रवाह अखिल भारत नेपाली एकता समाजले अभिभावकीय भूमिका निर्वाह गर्दै आएको केन्द्रीय अध्यक्ष प्रेम पौडेलले बताउनुभएको छ ।
मूल प्रवाह अखिल भारत नेपाली एकता समाज मध्य दक्षिण क्षेत्रीय समितिको आयोजनामा १५ नोभेम्बर २०२६ का दिन हैदराबादमा सम्पन्न २०८३ सालको प्रगतिशील जनवादी भैलो कार्यक्रमलाई उद्घाटन गर्दै प्रमुख अतिथि पौडेलले उक्त धारणा व्यक्त गर्नुभएको हो ।
उहाँले भारतमा नयाँ आधार कार्ड बनाउन बन्द गरिएकाले नेपालीहरूलाई विभिन्न कार्य गर्न कठिनाइ भइरहेको बताउनुभयो । आधार कार्डको अभावले विशेषगरी नयाँ पुस्ताको भविष्य अन्योलमा परेको उल्लेख गर्दै उहाँले भारतमा रहेका नेपालीहरूले भोगिरहेका समस्याप्रति चिन्ता व्यक्त गर्नुभयो ।
भारतमा रहेका नेपालीहरूको हकहित, अधिकार र सुरक्षाका लागि मूल प्रवाहले निरन्तर आवाज उठाउँदै आएको बताउँदै पौडेलले आगामी १४, १५ र १६ फेब्रुअरी २०२७ मा भारतको राजधानी नयाँ दिल्लीमा सम्पन्न हुन गइरहेको समाजको नवौँ राष्ट्रिय सम्मेलनले नेपालीहरूका समस्या समाधानका लागि महत्वपूर्ण भूमिका खेल्ने विश्वास व्यक्त गर्नुभयो।
उहाँले सम्मेलनलाई सफल बनाउन सबैलाई सक्रियतापूर्वक लाग्न आह्वानसमेत गर्नुभयो ।
कार्यक्रमको उद्घाटन अध्यक्ष पौडेलले दीप प्रज्वलन गरी गर्नुभएको थियो । कृष्णबहादुर थापाको अध्यक्षतामा सम्पन्न कार्यक्रमको सञ्चालन तिलक रानाले गर्नुभएको थियो भने उपस्थित जनसमुदायलाई राजु दुलालले स्वागत गर्नुभएको थियो ।
कार्यक्रममा केन्द्रीय सदस्यहरू फूलबीना पौडेल र रतन सिंह कर्मा, मध्य दक्षिण क्षेत्रीय उपाध्यक्ष गगन सिंह विक, केन्द्रीय सांस्कृतिक विभागकी माया थापा, मध्य दक्षिण क्षेत्रीय महिला विभाग संयोजक सोबीता पौडेल, विद्यार्थी विभागकी ममता कडायत तथा क्षेत्रीय वैकल्पिक सदस्य भरतबहादुर विक अतिथिका रूपमा उपस्थित हुनुहुन्थ्यो।
कार्यक्रमको सुरुवातमा रक्तिम सांस्कृतिक कलाकारहरूले स्वागत गीत प्रस्तुत गरेका थिए भने ज्ञात–अज्ञात सहिदहरूको सम्झनामा एक मिनेट मौनधारण गरिएको थियो ।
साँझको समयमा रक्तिम सांस्कृतिक कलाकारहरूले जनवादी गीत तथा नृत्य प्रस्तुत गर्नुका साथै जनवादी भैलो प्रदर्शन गरेका थिए । जनवादी गीत र नृत्यको प्रस्तुतिमा सहभागीहरूले उत्साहपूर्वक साथ दिएका थिए ।
कार्यक्रमको अन्त्यमा सहभागीहरूले आगामी नवौँ राष्ट्रिय सम्मेलनको प्रचारप्रसारमा सक्रियतापूर्वक लाग्ने प्रतिबद्धता व्यक्त गर्दै कार्यक्रम सम्पन्न भएको घोषणा गरेका थिए ।
