वासिङटन । अमेरिकामा २६ वर्षपछि फेरि दादुरा सङ्क्रमण देखिएको छ । अघिल्लो वर्षको सुरुआतयता दादुराको सङ्क्रमण झन्डै ८ हजार जना व्यक्तिमा देखिएको छ भने १३ जनाको मृत्यु रेकर्ड गरिएको छ ।
कोभिड महामारीको समयमा खोपप्रति न्यून विश्वसनीयता देखिएयता बालबालिकाले खोप लिने क्रम नाटकीय रूपमा घट्नुलाई यसको प्रमुख कारण मानिएको छ । स्वास्थ्यमन्त्री रोबर्ट केनेडी जुनिअर पनि खोपप्रति शङ्कालु दृष्टिकोण राख्नेमध्ये एक मानिन्छन् ।
पान अमेरिकन हेल्थ अर्गनाइजेशन (पिएएचओ) ले मेक्सिको र बोलिभियालाई पनि दादुरामुक्त हैसियतबाट हटाएको छ । संयुक्त राष्ट्र सङ्घको एउटा विशिष्टीकृत निकाय पिएएचओले १२ महिनाभन्दा बढीसमयसम्म एउटा प्रकारको दादुराको सङ्क्रमण अमेरिकामा अविराम ढङ्गले फैलिरहेको निष्कर्ष निकालेको हो ।
पिएएचओका निर्देशक जार्बास बार्बोजाले खोप अभियानमा देखिएका खाडलका कारण पुन: देखिएका सङ्क्रमणले गर्दा मेक्सिको र बोलिभियाले पनि दादुरा उन्मूलन गरेका राष्ट्रको हैसियत गुमाएको बताए ।
यता, अमेरिकाका स्वास्थ्यमन्त्री रोबर्ट एफ केन्नेडी जुनिअरले देशको खोपसम्बन्धी नीति र सुझावमा व्यापक परिवर्तन ल्याउने प्रयास गरेको मानिन्छ ।
खोपलाई शङ्कालु नजरले हेर्ने उनले हालैका वर्षमा अमेरिकामा खोप लगाउने प्रतिशत घटिरहँदा एमएमआर खोपको सुरक्षालाई लिएर पनि बारम्बार प्रश्न उठाउने गर्थे ।
केनेडीले आफूले जिम्मेवारी सम्हाल्नुअघिबाट नै दादुराका सङ्क्रमणका घटना बढेको भन्दै छिमेकी देशमा पनि बढी सङ्क्रमण देखिएको तर्क गरे ।
मङ्गलवारको घोषणापछि सेन्टर फर डिजिज कन्ट्रोल र उसका साझेदारले दादुरा सङ्क्रमण रोक्न, अमेरिकीको सुरक्षा गर्न र दादुरा उन्मूलन हैसियत प्राप्त गर्न प्रतिबद्ध रहेको जनाएको छ ।
अमेरिकामा एमएमआर खोप लगाउने दर ९२.४ प्रतिशतमा झरेको छ जुन हर्ड इम्युनिटी भनिने सामूहिक रूपमा प्रतिरोधी क्षमता कायम राख्ने ९५ प्रतिशत भन्दा कम हो ।