लस एन्जलस । मेक्सिकोको क्यालिफोर्निया प्रायद्वीपको तटनजिकै समुद्रमा डुब्न लागेको डुङ्गाबाट अमेरिकी कोस्टगार्डले १६ जनाको उद्धार गरेको छ भने अन्य ११ जना अझै बेपत्ता छन् ।
उक्त घटना मेक्सिकोको एन्सेनाडा सहरबाट करिब दुई सय २५ किलोमिटर पश्चिममा भएको हो ।
शुक्रबार स्थानीय समयअनुसार बिहान करिब १ बजे सानडिएगोस्थित कोस्टगार्डले डुङ्गामा पानी भरिएको भन्दै आएको आपत्कालीन सन्देश प्राप्त गरेको थियो ।
उद्धार अभियानमा कोस्टगार्डका विमान तथा जहाजसँगै अमेरिकी नौसेनाको युएसएस किङ्सभिल जहाज र हेलिकप्टर परिचालन गरिएको थियो । खोजीका क्रममा डुङ्गाका अवशेष फेला परेका थिए ।
उद्धार गरिएका १६ जनालाई थप स्वास्थ्य परीक्षणका लागि स्थानीय अस्पताल पठाइएको छ । उनीहरूमध्ये दुई जना मेक्सिकन नागरिक रहेको अधिकारीले बताएका छन् ।
कोस्टगार्डका अनुसार डुङ्गामा ठुलो सङ्ख्यामा मानिस सवार थिए । त्यसले अवैध समुद्री तस्करीमा प्रयोग हुने मार्ग पछ्याइरहेको थियो । घटनाको कारण खुलेको छैन । बेपत्ता व्यक्तिको खोजी जारी छ । (रासस/सिन्ह्वा)
