काठमाडौँ । भारतको नयाँदिल्लीस्थित रामलीला मैदानमा सधैँजसो बडादशैँमा रावणको पुतला जलाउने गरिएकोमा यसपटक साङ्लोको पनि पुतला जलाइने भएको छ ।
आगामी २०८३ कात्तिक ४ गते बडादशैँका दिन रावण, कुम्भकर्ण, मेघनाथसँगै साङ्लाको ३० फिट अग्लो पुतलासमेत जलाइने भएको हो ।
रामलीला मैदानमा पुतला जलाउनका लागि दिल्लीको पितमपुरामा एउटा आयोजक समिति गठन गरिएको छ । सो समितिको अध्यक्ष सत्तारूढ भारतीय जनता पार्टीका नेता तथा नयाँदिल्ली विधानसभाका विधायक अशोक गोयल छन् । उनको नेतृत्वमा गठन गरिएको आयोजक समितिको नाम ‘श्री केशव रामलीला समिति’ रहेको छ ।
मिडियालाई प्रतिक्रिया दिँदै विधायक गोयलले फोहोरको प्रतीकको रूपमा साङ्लोलाई लिइएको र सोहीअनुसार पुतला दहन गर्न लागिएको जानकारी दिए ।
‘स्वच्छ भारत र स्वच्छ दिल्ली अभियानको सन्देश अगाडि बढाउन साङ्लोको पुतला दहन गरिँदैछ’ भारतीय मिडियासित गोयलले भनेका छन्– ‘यसको पछाडि कुनै राजनीतिक उद्देश्य छैन ।’
उनले ‘नराम्रो’ माथि ‘राम्रो’ को जितको सन्देशसँगै स्वच्छताको महत्त्वबारे उक्त कार्यक्रमार्फत जानकारी दिइने दाबी गरे ।
गोयलले थपे– ‘रामलीला मैदानको कार्यक्रममा रावण सेनाको एउटा अङ्गको रूपमा साङ्लालाई ‘असुर’ को रूपमा दर्साइनेछ र त्यसलाई जलाएर अन्त गरिनेछ ।’
भारतमा बडादशैँलाई रामले रावणलाई अन्त गरेको दिनको रूपमा ‘विजयादशमी’ वा ‘दशहरा’ को रूपमा मनाउने गरिन्छ ।
