काठमाडौँ । प्रगतिशील पत्रकार सङ्घले बेपत्ता पत्रकार, निजका परिवारसहित सम्पूर्ण प्रभावित मानिसको खोजी, उद्धार र राहतकार्यमा ध्यान दिन सरकारसित माग गरेको छ ।
अध्यक्ष श्यामलाल पोखरेलको हस्ताक्षरमा २०८३ भदौ ११ गते बिहीबार प्रेसवक्तव्य जारी गर्दै प्रगतिशीलले सो धारणा सार्वजनिक गरेको हो ।
प्रेसवक्तव्यमा ज्ञातअज्ञात मृतकप्रति श्रद्धाञ्जली, शोकसन्तप्त परिवारजनप्रति समवेदनासँगै घाइतेको नि:शुल्क उपचार र बेघरबारको व्यवस्थापनमा ध्यान दिन पनि आग्रह गरेको छ ।
नेपाली र विश्वका जनताको सहयोगबाट रसुवा त्रासदीबाट माथि उठ्नुको विकल्प नरहेको सो सङ्गठनको धारणा रहेको छ ।
प्रारम्भिक तथ्यका आधारमा विश्वको बढ्दो तापक्रमका कारण रसुवा घटना घटेको बताउँदै प्रगतिशीलले हिमालको रक्षाका लागि नेपालले विश्वसामु आवाज उठाउनुपर्ने आवश्यकतामा पनि जोड दिइएको छ ।
यस्तो छ, प्रेसवक्रव्यको पूर्ण पाठ :
“२०८३ भदौ १० गते बुधबार बिहान चीनको तिब्बतबाट ल्हेन्दो खोला हुँदै भोटेकोशीमा आएको भीषण बाढीले रसुवा, नुवाकोट, धादिङ, गोरखा र चितवनसम्म अकल्पनीय प्रकारले जनधनको क्षति गरेको छ । बाढीबाट रसुवा र नुवाकोटमा अत्यधिक जनधन र भौतिक संरचनाको क्षति भएको छ भने धादिङमा पनि भौतिक क्षति भएको छ । यतिखेर मृतकका शव चितवन, नवलपरासी (बर्दघाट सुस्ता पूर्व) र नवलपरासी (बर्दघाट सुस्ता पश्चिम) सम्म फेला परिरहेका छन् । रसुवा र नुवाकोटमा शवको उत्खनन् गर्नै बाँकी छ । सरकारले यतिखेर तात्कालिक प्रकृतिको द्रुत उद्धार तथा राहतकार्यमै ध्यान केन्द्रित गरिरहेको छ ।
यो प्रेसवक्तव्य जारी गर्दासम्म लगभग चार सय जनाको शव फेला परिसकेको छ भने त्योभन्दा बढीको उद्धार भइसकेको छ । बाढीमा नेपालका मात्रै नभएर थुप्रै विदेशी नागरिकसमेत परेका छन् । यस क्रममा नेपाल पत्रकार महासङ्घका पूर्व केन्द्रीय सदस्य टेकराज थामी र भक्तपुरका पत्रकार शेखर ढुङ्गाना सम्पर्कविहीन अवस्थामा छन् भने रसुवाका पत्रकार निराजन पौडेलेको परिवार पनि सम्पर्कविहीन अवस्थामा छन् ।
प्रगतिशील पत्रकार सङ्घ रसुवा बाढीले ल्याएको त्रासदीप्रति गम्भीर दु:ख व्यक्त गर्दछ । ज्ञातअज्ञात मृतकप्रति श्रद्धाञ्जली व्यक्त गर्दै मृतकका परिवारप्रति समवेदना व्यक्त गर्दछ । घाइतेको तदारुकताका साथ नि:शुल्क उपचारको व्यवस्था गर्न माग गर्दछ । त्यस्तै तीव्र गतिमा बेपत्ताको खोजी, उद्धार र राहतकार्यसँगै प्रभावित बेघरवारजनको व्यवस्थापनमा तीव्रता दिन सरकारसित आग्रह गर्दछ । बिपद्को यो अवस्थामा विश्वले नै सहयोगको हात बढाइरहेका बेला सबैको सहयोगबाट यो प्राकृतिक त्रासदीबाट छिटोभन्दा छिटो माथि उठ्ने प्रयास गर्नुको विकल्प हामीसँग छैन ।
प्रारम्भिक तथ्यको आधारमा रसुवा त्रासदी सामान्य प्राकृतिक विपत्ति होइन, यो त मुख्यत: विश्वको बढ्दो तापक्रमको अनिवार्य परिणाम हो भन्ने निष्कर्ष निकाल्न कठिनाइ छैन । जति बेला यो बाढी आएको थियो, त्यति बेला नेपालमा वर्षा भइरहेको थिएन । तिब्बततर्फको अस्वाभाविक भौगर्भिक हलचलबाट ल्हेन्दो खोला थुनिन पुगेको थियो । यस घटनाको ठोस कारण छिट्टै पत्ता लाग्ने नै छ तर पनि एउटा तथ्य स्पष्ट छ– नेपालजस्तो हिमाली मुलुकमा विश्वको बढ्दो तापक्रमले गम्भीर दुष्परिणाम निम्त्याइरहेको छ, अहिलेको बाढी त सुरुआत मात्र हो । जबसम्म विश्वको तापक्रम नियन्त्रण हुँदैन, तबसम्म यस्ता जोखिमबाट हाम्रो देश झनै बढी पीडित हुनेछ । त्यसैले हिमालको रक्षाका लागि विश्वको पर्यावरण रक्षा गर्न हामीले सरकार र विश्व जनमतको ध्यानाकर्षण गराउन चाहान्छौँ ।”