तौलिहवा । कपिलवस्तु शिवराज नगरपालिका वडा नं. ३ भितरिया गाउँमा राष्ट्रिय जनमोर्चाको दोस्रो भेला सम्पन्न भएको छ ।
राजमो कपिलवस्तुका सचिव केरसिंह अदैको प्रमुख आतिथ्यमा २०८१ मङ्सिर १३ गते बिहीबार सो भेला सम्पन्न भएको हो ।
सो अवसरमा मन्तव्य राख्दै सचिव अदैले जनताबाट जितेर गएको भनिएका कथित ठुला पार्टीले राष्ट्रघात र भ्रष्टाचार गरेको आरोप लगाउनुभयो ।
सत्तारूढ दलको यस्तो चरित्रकै कारण देशको यो बेहाल भएको धारणा उहाँको थियो ।
मन्तव्यको क्रममा उहाँले राजमोले उठाएको सङ्घीयता विरुद्धको आवाज अहिले जनताद्वारा सही प्रमाणित भएको ठहर गर्नुभयो ।
भेलामा राजमो खरेन्द्रपुरका अध्यक्ष रामदेव कुर्मी र अखिल नेपाल जनजाति सम्मेलन शिवराज नगर समितिका अध्यक्ष करन पुनले शुभकामना दिनुभएको थियो ।
अध्यक्षमा भण्डारी
भेलाले दुर्गाबहादुर भण्डारी अध्यक्ष रहनुभएको नौ पूर्ण र दुई सल्लाहकार गरी ११ सदस्यीय राजमोको भितरिया गाउँ समिति गठन गरेको छ ।
समितिको उपाध्यक्षमा लीलबहादुर कुँवर, सचिवमा ज्ञानबहादुर पुन, कोषाध्यक्षमा कृष्णा भण्डारी तथा सदस्यमा गुलाबरानी थारू, भूवन कुँवर, विष्णुबहादुर सार्की, रामपाल थारू र सीता पुन रहनुभएको छ ।
भेलाले नोखै थारू र थमबहादुर भण्डारीलाई सल्लाहकारमा चयन गरेको छ ।
भेलापछि बसेको बैठकले राजमोको सदस्यता नवीकरण गर्ने तथा पुस महिनामा प्रशिक्षण कार्यक्रम आयोजना गर्ने निर्णय गरेको बताइएको छ ।
लीलबहादुर कुँवर अध्यक्षता तथा ज्ञानबहादुर पुनको सञ्चालनमा अघि बढेको सो भेलामा उपस्थित जनसमुदायलाई दुर्गाबहादुर भण्डारीले स्वागत गर्नुभएको थियो ।
