चितवन । चितवनको भरतपुर महानगरपालिका–२०, दद्रेनीमा मोहन वैद्य नेतृत्वको क्रान्तिकारी माओवादीका कार्यकर्ताले स्कुल बसमा आगजनी गरेका छन् ।
सो दलको भातृ संगठन अनेरास्ववियु (क्रान्तिकारी)ले कल्याणपुरस्थित स्मल हेभेन इङ्लिस बोर्डिङ स्कुलको बसमा आगजनी गरेको हो ।
सडकमा गुडिरहेको बागमती प्रदेश– ०६–००१ क ०४५ नम्बरको बसमा आइतबार बिहान आगजनी भएको थियो ।
बिहान करिब ८ः०० बजेको समयमा विद्यार्थी लिन गएको सो बसमा तीनवटा मोटरसाइकलमा आएका ६ जना कार्यकर्ताले दद्रेनी पुलमा रोकेर आगजनी गरेका प्रहरीले जनाएको छ ।
विहान आगजनी गरेको अखिल (क्रान्तिकारी)ले आइतबार अपरान्ह विज्ञप्ति निकालेर घटनाको जिम्मा लिएको छ। क्रान्तिकारी चितवन जिल्ला अध्यक्ष सुमनाले विज्ञप्ति निकालेर घटना आफूहरूको कार्यकर्ताले गराएको स्वीकार गरेका छन् ।
विज्ञप्तिमा कांग्रेसका नेता उमेश श्रेष्ठले सञ्चालन गर्दै आएको स्मल हेभेन स्कुलले चर्को शुल्क असुल्ने, अभिभावकहरूलाई शोषण गर्दै आएको दाबी गरिएको छ । साथै, पटकपटक चेतावनी दिँदासमेत प्रवाह नगरेको हुँदा स्कुल बसमाथि चेतावनीपुरूर्वक कारबाही गरिएको विज्ञप्तिमा उल्लेख छ।
बसका चालकले प्रहरीलाई दिएको बयान अनुसार उनीहरुले बसमा रहेका विद्यार्थी र स्टाफलाई उतार्दै मोबाइल नियन्त्रण लिइ आगो लगाएर भागेका थिए ।
जिल्ला प्रहरी कार्यालय चितवनका प्रवक्ता भेषराज रिजालले घटनामा संलग्नको खोजी भइरहेको बताए । हालसम्म कोही पनि पक्राउ नपरेको चितवन प्रहरीले जनाएको छ।
