काठमाडौं । जनता समाजवादी दल, नेपालका अध्यक्ष उपेन्द्र यादवले सत्तासाझेदार दलकै नेताहरूले पार्टी फुटाइदिएको आरोप लगाएका छन् ।
बुधबार पत्रकार सम्मेलन गर्दै अध्यक्ष यादवले आफूलाई सत्ताविमुख बनाउन खोज्नेहरूका कारण पार्टी फुटेको बताएका हुन् ।
अध्यक्ष यादवले नेकपा (एमाले) का अध्यक्ष केपी ओली र प्रधानमन्त्री पुष्पकमल दाहाल प्रचण्डप्रति लक्षित गर्दै सत्ता साझेदार दलका शीर्ष नेताहरूले आफ्नाबारे भ्रम फैलाएको, पार्टी फुटाइदिएको, अनेकौँ चलखेल गरेको आरोप लगाए ।
तर, सरकार नछाड्ने र ठूला दलका व्यवहारका आधारमा निर्णय गर्ने जानकारी उनले पत्रकार सम्मेलनमा दिए।
‘सरकारमै रहेका पार्टीका नेताहरुले भ्रम फैलाएर जसपाले यो सरकार ढालेर अर्को बनाउन लाग्यो भनेर, त्यो अत्यन्त कपोलकल्पित, आधारहीन र प्रायोजित ढंगले चलाइएको अफवाह हो,’ उनले भने, ‘यति हुँदाहुँदै पनि हामीले सरकारलाई समर्थन निरन्तर कायम राखेका छौँ। फिर्ता लिएका छैनौँ र यो रहन्छ।’
उनले जसपाले सरकार ढाल्न लागेको हल्ला सत्य नभएको तर्क गरे। ‘त्यो कपोलकल्पित अफवाह मात्रै हो। यति हुँदाहुँदै पनि हामी यही सरकारमै रहन्छौँ। यो सरकारलाई दिएको समर्थन फिर्ता लिँदैनौँ।’
अध्यक्ष यादवले पार्टी विभाजनविरुद्ध कानुनी र राजनीतिक लडाइँ लड्ने पनि बताए । पार्टी केन्द्रीय कार्यालय बालकुमारीमा आयोजित पत्रकार सम्मेलनमा अध्यक्ष यादवले जसपा विभाजनपछि बनेको नयाँ दल असंवैधानिक भएको दाबी गरे।
‘नयाँ दल दर्ता असंवैधानिक छ,’ यादवले भने, ‘त्यसको कानुनी हैसियत छैन। त्यसविरुद्ध हामी अदालत जान्छौँ। कानुनी र राजनीतिक लडाई लड्छौँ।’
उनले पार्टी विभाजनको हल्ला चलाइए पनि पार्टीको केन्द्रीय समितिमा दुई तिहाई र कार्यकारिणी समितिमा बहुमत सदस्य आफ्नो पक्षमा रहेको दाबी गरे।
आफूले अमेरिका जानु अघि कार्यवाहक अध्यक्ष दिएर गएको नेताले नै अहिले पार्टी फुटाएको गुनासो गरे। ‘त्यस्ता अतृप्त आत्माहरु जम्मा गरेर पार्टी बन्दैन,’ उनले भने।
यादव अमेरिका भ्रमणमा रहेकैबेला गएको सोमबार नेता अशोक राईले आफूसमेत सात जना सांसदलाई साथमा लिएर जसपा विभाजन गरेका थिए।
पार्टी विभाजनपछि अब उपेन्द्र यादवको पक्षमा ५ जना मात्रै सांसद छन्। जसपा विभाजनपछि गठन भएको राई नेतृत्वको जनता समाजवादी पार्टीलाई निर्वाचन आयोगले दर्ता गरेर दलको मान्यतासमेत दिइसकेको छ।
