काठमाडौँ । आगामी २०८१ वैशाख १५ गते हुने भनिएको इलाम र बझाङ उपनिर्वाचनको कार्यतालिका सार्वजनिक भएको छ ।
निर्वाचन आयोगले २०८० फागुन १४ गते सोमबार प्रेसविज्ञप्ति जारी गर्दै कार्यतालिका सार्वजनिक गरेको हो ।
निर्वाचन आयोगका उपसचिव तथा सहायक प्रवक्ता डा. थानेश्वर भुसालले जारी गर्नुभएको प्रेसविज्ञप्तिका अनुसार इलाम जिल्ला प्रतिनिधि सभा निर्वाचन क्षेत्र नं. २ तथा बझाङ जिल्ला प्रतिनिधि सभा निर्वाचन क्षेत्र नं. १ को प्रदेशसभा निर्वाचन क्षेत्र नं. १ का लागि निर्वाचन कार्यतालिका स्वीकृत भएको छ ।
स्वीकृत निर्वाचन कार्यतालिकाअनुसार आगामी फागुन १६ गतेदेखि मतदाता नामावली अद्यावधिक कार्यक्रम सञ्चालन गरी चैत २२ गते अन्तिम मतदाता नामावली प्रकाशन गरिने छ । उपनिर्वाचनमा भाग लिन चाहने राजनीतिक दल दर्ताका लागि फागुन २४ देखि ३० गतेसम्मको म्याद दिइने छ ।
त्यस्तै, चैत २२ गते मुख्य निर्वाचन अधिकृतको नियुक्ति र सोही दिन मुख्य निर्वाचन अधिकृतको कार्यालय स्थापना गरी चैत २४ देखि २७ गतेसम्म निर्वाचन अधिकृतको कार्यालयमा निर्वाचन कार्यक्रम सञ्चालन हुने छ । निर्वाचन कार्यक्रमअनुसार चैत २४ गते उम्मेदवारको मनोनयन दर्ता र चैत २७ गते उम्मेदवारको अन्तिम नामावली प्रकाशन गरी निर्वाचन चिह्न वितरण गरिने छ ।
चैत २८ देखि २०८१ वैशाख १२ गतेसम्म उम्मेदवारद्वारा प्रचार प्रसारको अवधि रहने छ र । वैशाख १५ गते बिहान ७ बजेदेखि बेलुका ५ बजेसम्म सम्बन्धित मतदान केन्द्रमा मतदान हुने छ ।
