शाहस भट्ट, काठमाडौँ ।
नेकपा (विप्लव) निकट जनपत्रकार सङ्गठनले नेपाल पत्रकार महासङ्घ उपत्यका प्रदेश कार्यालयमा तालाबन्दी गरेको छ ।
काठमाडौं जिल्ला शाखाबाट आवेदन दिएका पत्रकारको सदस्यता स्थगन गरेर महासङ्घको सदस्यता पाउने अधिकार खोसेको भन्दै सङ्गठनले २०८० माघ १७ गते बुधबार प्रदेश कार्यालयमा तालाबन्दी गरेको हो ।
सङ्गठनका उपत्यका प्रदेश संयोजक शोभराज बरालको नेतृत्वमा गएको टिमले कार्यालयको मूल गेटमा तालाबन्दी गरेको थियो ।
सङ्गठनले तत्काल प्रदेशले गरेको सदस्यता स्थगन फुकुवा गरेर निष्पक्ष छानबिन गरी सदस्यता दिलाउन माग गरेको छ ।
पत्रकार महासङ्घले गत बैशाखमा नयाँ सदस्यता आह्वान गरेको भए पनि मापदण्ड पुगेका पत्रकारलाई आवेदन दिन महासङ्घले आनाकानी गर्दै सिन्डिकेट लाद्न खोजेपछि सङ्गठनले तालाबन्दी गर्नुपरेको संयोजक बरालको भनाइ छ ।
महासङ्घको सदस्यता विवाद पनि जिल्ला शाखाले आफूनिकटका पत्रकारको नाम छनोट गरी प्रदेशमा पठाएको थियो । प्रदेशले जिल्ला पठाएको नामावली चित्त नबुझेको भन्दै नयाँ सदस्यता आवेदन दिएका पत्रकारको सदस्यता स्थगन गरेको थियो ।
बरालले नयाँ सदस्यताका लागि काठमाडौँ जिल्ला शाखाबाट आवेदन दिएका ६३७ जनाकै एक एक फाइल खोलेर छानबिन गर्न जोडदार माग गरेका छन् ।
‘महासङ्घको विद्यानअनुसार मापदण्ड पुगेका पत्रकारले सदस्यता पाउनुपर्छ । त्यो उनीहरूको अघिकार हो’ तालाबन्दीपछि पत्रकारसँग बरालले भने– ‘पत्रकारको हक–अधिकार सुचिश्चित गर्न स्थापना भएको महासङ्घले नै उनीहरूमाथि अन्याय गरेको छ । यो अन्याय विरुद्ध जनपत्रकार सङ्गठन नेपालले महासङ्घमा तालाबन्दी लगाएको हो ।’
सङ्गठनले आफ्ना मागमाथि बेवास्ता गरे आफूहरू थप सङ्घर्षका कार्यक्रम गर्न बाध्य हुने जनाएको छ ।
सङ्गठनले यसअघि विभिन्न माग राख्दै प्रदेश कार्यालयमा ज्ञापनपत्र बुझाएको थियो । तालाबन्दीमा सङ्गठनका २५ जनाको उपस्थिति रहेको थियो ।
