टेकराज भुसाल, सन्धिखर्क ।
अर्घाखाँचीस्थित स्मृतिशेष कुलानन्द बन्जाडे स्मृति–प्रतिष्ठान ढाकावाङ्गको अध्यक्षमा भुवानन्द भुसाल निर्वाचित हुनुभएको छ ।
२०८० माघ १६ गते मङ्गलबार सम्पन्न तेस्रो भेलाले भुवानन्द भुसालको अध्यक्षतामा नौ सदस्यीय समिति निर्वाचित गरेको हो ।
समितिको उपाध्यक्षमा बाबुराम खनाल, सचिवमा हिमलाल खनाल, कोषाध्यक्षमा आरता बेल्वासे तथा सदस्यहरूमा खुबिराम खनाल, विष्णुप्रसाद खनाल, गीता चुदाली, जानका बन्जाडे र बाबुराम खनाल निर्वाचित गरेको छ ।
भेलाले सल्लाहकारमा खड्कबहादुर थापा, चन्द्रबहादुर केसी, रामप्रसाद खनाल र गोपालप्रसाद आचार्य र पदम बन्जाडेलाई चयन गरेको छ ।
भूमिकास्थान नगरपालिका नगरप्रमुख झविलाल थापाको विशेष आतिथ्य रहेको भेला अध्यक्ष खड्कबहादुर थापाको अध्यक्षता, उपाध्यक्ष भुवानन्द भुसालको स्वागत मन्तव्य तथा सचिव खुविराम खनालको सञ्चालनमा अघि बढेको थियो ।
नेपालको वाम–लोकतान्त्रिक आन्दोलनका कर्मठ योद्धा तथा शिक्षाप्रेमी, समाजसेवी, विश्व मावि ढाकावाङका तत्कालीन प्रधानाध्यापक बन्जाडेको सम्झनामा स्थापित प्रतिष्ठानले तेस्रो भेला सम्पन्न गरेको हो ।
