काठमाडौँ । अखिल नेपाल किसान महासङ्घ (अप्फा) ले बागमती प्रदेशका सबै जिल्लामा कृषि सहकारी स्थापना गर्ने भएको छ ।
राष्ट्रिय जनमोर्चाको केन्द्रीय कार्यालय भवन कपनमा २०८० माघ १४ गते आइतबार सम्पन्न अप्फाको बागमती प्रदेश समितिको बैठकले सो निर्णय गरेको हो ।
केन्द्रीय अध्यक्ष भैरवराज रेग्मीको प्रमुख आतिथ्य तथा प्रदेश अध्यक्ष केबी घलेको अध्यक्षतामा उक्त बैठक बसेको थियो ।
‘अप्फाको केन्द्रीय समिति बैठकले किसान सङ्गठनलाई उत्पादन र कृषि सहकारीसँग जोड्ने निर्णय गरेको छ’ बैठकको निर्णय जानकारी गराउँदै प्रदेश अध्यक्ष घलेले युगदर्शनसित भन्नुभयो– ‘सोही निर्णयअनुसार आजको बैठकले बागमती प्रदेशका सबै जिल्लामा कृषि सहकारी खोल्ने निर्णय गरेको छ ।
उहाँले उक्त कार्य सम्पन्न गर्नका लागि अप्फाका जिल्ला समितिको बैठक बसेर ठोस कार्ययोजना बनाइने बताउनुभयो ।
प्रशिक्षण पनि
बैठकपूर्व अप्फाका केन्द्रीय अध्यक्ष रेग्मी अप्फाको नीति तथा कार्यक्रम र आन्तरिक सङ्गठनात्मक विषयमा प्रशिक्षण दिनुभएको थियो ।
एवम् प्रकारले किसान सङ्गठन र सङ्घर्षलाई सञ्चारमाध्यममा प्रचार प्रसार गर्नेबारेमा युगदर्शनका कार्यकारी सम्पादक प्रकाश थापामगर र कृषिक्षेत्रमा रिपोर्टिङ गरिरहनुभएका अर्का पत्रकार धनबहादुर मगरले पनि प्रशिक्षण दिनुभएको थियो ।
