जुमानसिंह केसी, खलङ्गा ।
कार्यक्रममा राष्ट्रिय जनमोर्चाका उपाध्यक्ष दुर्गा पौडेलले ठोस परिस्थितिको ठोस विश्लेषण गर्दै अबको रणनीति र कार्यनीति बनाउन आवश्यक रहेको बताउनुभयो ।
प्रमुख अतिथि पौडेलले नेपालको कम्युनिस्ट आन्दोलनलाई अघि बढाउन संयुक्त मोर्चाको आवश्यकता रहेकोसमेत औल्याउनुभयो । उहाँले लेनिनको विचार अझै आवश्यक रहेको उल्लेख गर्नुभएको थियो ।
देशमा एउटा मात्र कम्युनिस्ट पार्टी रहने भन्दै उहाँले नेपालमा पनि त्यसलाई एकताबद्ध गर्न सबै लाग्नुपर्ने बताउनुभयो ।
विश्व कम्युनिस्ट आन्दोलन अहिले रक्षात्मक अवस्थामा पुगेको र त्यसको प्रभाव नेपाली कम्युनिस्ट आन्दोलनमा समेत देखा परेको उहाँले बताउनुभयो ।
लेनिनको शताब्दी स्मृतिदिवसको अवसरमा २०८० माघ ७ गते नेपाल कम्युनिस्ट पार्टी (मसाल) जिल्ला समिति प्युठानले क्वाडीको बालमन्दिरमा आयोजना गरिएको अन्तक्र्रिया कार्यक्रममा बोल्ने वत्ताहरूले लेनिनले कम्युनिस्ट आन्दोलनका लागि गरेको योगदानको चर्चा गर्दै अहिलेको परिवेशमा कम्युनिस्ट पार्टीले अबको कार्यदिशाको बारेमा विचार विमर्श गरेर रणनीति र कार्यनीति बनाउनुपर्ने बताएका छन् ।
नेकपा (मसाल) लुम्बिनी प्रदेशका प्रवक्ता तिलक जिसीले कम्युनिस्ट आन्दोलनलाई कमजोर बनाउन कम्युनिस्ट विचार पुरानो भयो भनेर भ्रम फैलाउने काम भइरहेको बताउनुभयो ।
उहाँले पहिलेको तुलनामा अहिले शोषणको शैली फेरिएको भन्दै त्यसको विरुद्ध लड्न नयाँ तरिका अपनाउनुपर्ने बताउनुभयो ।
‘संसदीय व्यवस्था पुरानो नहुने, त्यसपछि आएको माक्र्सवाद पुरानो कसरी हुन सक्छ ?’ उहाँले भन्नुभयो– ‘माक्र्सवाद, साम्यवाद, वैज्ञानिक समाजवाद गतिशील छन् ।’
कार्यक्रममा नेकपा (माओवादी केन्द्र) का केन्द्रीय सदस्य नारायणप्रसाद अधिकारीले रुसमा ४८ वर्षको उमेरको लेनिनले रुसी क्रान्ति सफल गरेको भन्दै अहिले कम्युनिस्ट आन्दोलनमा देखिएको चुनौती चिर्नका लागि कम्युनिस्ट नेताहरूले सोच्नुपर्ने बताउनुभयो ।
कार्यक्रममा नेकपा (एकीकृत समाजवादी) का जिल्ला उपसचिव खिमबहादुर सुनार, राजमो जिल्ला अध्यक्ष ज्ञामुराम न्यौपानेले आफ्नो धारणा राख्नुभएको थियो ।
कार्यक्रममा नेकपा (मसाल) का जिल्ला प्रवक्ता राम पहाडीले अवधारणापत्र प्रस्तुत गर्नुभएको थियो भने कार्यक्रमको सञ्चालन अखिल (छैठौं) का महासचिव सुवास जिसीले गर्नुभएको थियो ।
