सानफ्रान्सिस्को । सन् २०२१ मा अमेरिकी संसद् भवनमा भएको आक्रमणमा संलग्न भएको आरोपमा पूर्व राष्ट्रपति डोनाल्ड ट्रम्पलाई आगामी वर्ष हुने अमेरिकी राष्ट्रपतीय प्राथमिक (प्रथम चरण) को निर्वाचनमा अमेरिकी राज्य मेनको मतपत्रमा राख्नका लागि अयोग्य घोषित गर्ने निर्णय गरेको छ ।
सन् २०२० को निर्वाचन परिणाम उल्टाउने प्रयासमा अमेरिकी संसद् भवनमा गरेको हिंसामा आफ्ना प्रशंसकलाई उक्साउने काम गरेको ठहर गर्दै पूर्व राष्ट्रपति ट्रम्प मेन राज्यको रिपब्लिकन प्राइमरी निर्वाचनका लागि योग्य नरहने अदालतले फैसला गरेको हो ।
मेनका स्टेट सेक्रेटरी सेना बेलोजका अनुसार ट्रम्पको चुनावी अभियानले बेलोजको निर्णय विरुद्ध मेनको राज्य अदालतमा अपिल गर्ने बताएको छ । उहाँले उक्त अदालती प्रणालीले यस मुद्दामा फैसला नगरेसम्म उक्त निर्णयलाई कार्यान्वयन नगरिने जानकारी दिनुभयो ।
उहाँका अनुसार सर्वोच्च अदालतले ट्रम्प मेन र अन्य राज्यमा मतपत्रमा समावेश हुने वा नहुने भन्नेबारे अन्तिम निर्णय गर्ने छ ।
कोलोराडो राज्यकी विदेशमन्त्री जेना ग्रिसवोल्डले कोलोराडो राज्यको सर्वोच्च अदालतले ट्रम्प विरुद्ध यसअघिको फैसलालाई सदर नगरेसम्म सन् २०२४ को राष्ट्रपतीय प्राइमरी निर्वाचनमा ट्रम्पको नाम यथावत रहने बिहीबार पुष्टि गर्नुभएको थियो ।
कोलोराडो रिपब्लिकन पार्टीले एन्डरसन विरुद्ध कोलोराडो सर्वोच्च अदालतको फैसला विरुद्ध अपिल गरेको छ ।
ग्रिसवोल्डले यससम्बन्धी आफ्नो धारणा राख्दै भन्नुभएको छ– ‘अमेरिकी सर्वोच्च अदालतले मुद्दा लिन इन्कार नगर्दा वा कोलोराडो उच्च अदालतको निर्णयलाई पुष्टि नगर्दासम्म दायर गरिएको अपिलको साथ ट्रम्पलाई कोलोराडोको सन् २०२४ को राष्ट्रपतीय प्राइमरी निर्वाचनमा उम्मेदवारको रूपमा समावेश गरिने छ ।’
यद्यपि ग्रिसवोल्डले आफ्नो भनाइमा सन् २०२० को निर्वाचन र विशेष गरी जनवरी ६, २०२१ को अमेरिकी संसद्मा भएको घटनालाई चौधौँ संशोधनको धारा तीनअन्तर्गत उल्टाउने प्रयासका कारण ट्रम्प अयोग्य भएको बताउनुभएको थियो । पूर्व राष्ट्रपति ट्रम्पले आरोपको खण्डन गर्दै आउनुभएको छ । (रासस/सिन्ह्वा)
