टेकराज भुसाल
अर्घाखाँची । अर्घाखाँचीका २ परिवारले स्मृतिशेष बुबा र छोराको सम्झनामा भूमिकास्थान–१० सेङलेङ्गमा रहेको सत्यदेवी आधारभूत विद्यालयमा अक्षयकोष स्थापना गरेका छन् ।
भूमिकास्थान नगरपालिका–१० धन्चौरका लक्ष्मण खनाल र सावित्रा खनालले स्मृतिशेष छोरा सम्राट खनालको सम्झनामा १ लाख १ हजार १११ रुपैयाँको अक्षयकोष स्थापनासँगै विद्यार्थीहरूलाई न्यानो कपडा वितरण गर्नुभएको थियो ।
त्यस्तै, धन्चौरकै रामप्रसाद खनाल र आशा खनालले स्मृतिशेष बुबा हिमलाल खनाल र स्मृतिशेष आमा हुककला खनालको सम्झनामा २५ हजार रुपैयाँको अक्षयकोष स्थापना गरेका हुन ।
बुधबार उनीहरूले विद्यालयलाई अक्षयकोष बराबर रकम भएको चेक प्रधानाध्यापक विष्णुप्रसाद बन्जाडे र विद्यालय व्यवस्थापन समितिका अध्यक्ष हिमनाथ खनाललाई हस्तान्तरण गरेका थिए ।
सो अवसरमा बोल्दै कार्यक्रमका प्रमुख अतिथि जनजागृती मावि धन्चौरका विद्यालय व्यवस्थापन समिति अध्यक्ष रेमलाल भट्टराईले विद्यालयहरूमा यस्ता सहयोगले विद्यार्थीहरूको शैक्षिक विकासमा टेवा पुग्ने भन्दै थप सहयोगको आवश्यकता रहेको बताए ।
प्रधानाध्यापक बन्जाडेले विद्यालयका प्रतिभाशाली र जेहेन्दार विद्यार्थीको उज्ज्वल भविष्यका लागि उक्त अक्षयकोष स्थापना गरेकाले उद्देश्य प्राप्तिका लागि उक्त अक्षयकोष उपयोग उहाँको भनाई थियो ।
कार्यक्रममा जनजागृती मावि धन्चौरका प्राचार्य पीताम्बर खनाल, अक्षयकोष दाता लक्ष्मण खनाल र रामप्रसाद खनालले मन्तव्य राखेका थिए ।
