खलङ्गा । जन्ती बोकेको वाहन अनियन्त्रित हुँदा निधन भएका राष्ट्रिय जनमोर्चाको तर्फबाट मल्लरानी गाउँपालिका वडा नम्बर ३ का वडासदस्य दामोदर नेपालीको दाहसंस्कार गरिएको छ ।
राजमो केन्द्रीय सदस्य तथा मल्लरानी गाउँपालिका अध्यक्ष कृष्णबहादुर खड्काले राजमोको झन्डा ओढाउँदै २०८० मङ्सिर २९ गते शुक्रबार दाहसंस्कार गरिएको हो ।
दाहसंस्कारपूर्व बिजुवारमा उहाँको पोस्टमार्टम गरिएको थियो ।
दाहसंस्कारस्थलमा अन्य राजनीतिक दलका नेताका साथै राजमोका नेताकार्यकर्ताको उपस्थिति रहेको थियो । उहाँहरूले स्मृतिशेष नेपालीलाई श्रद्धाञ्जली दिनुभएको थियो ।
२०३१ कात्तिक १६ गते प्युठानको चौरपानीमा जन्मनुभएका नेपाली राजमो मल्लरानी–३ को वडासदस्य तथा जातीय समता समाजको जिल्ला सदस्यसमेत हुनुहुन्थ्यो ।
उहाँका पत्नीका साथै एक छोरी र एक छोरा हुनुहुन्छ । छोरी सावित्रा नेपाली रक्तिम सांस्कृतिक अभियान र अखिल (छैठौं) को जिल्ला सदस्य हुनुहुन्छ ।
राजमो प्युठानद्वारा शोक व्यक्त
यसैबिच, राजमो प्युठानले स्मृतिशेष नेपालीको निधनप्रति शोक व्यक्त गरेको छ ।
जिल्ला अध्यक्ष ज्ञामुराम न्यौपानेको हस्ताक्षरमा मङ्सिर २९ गते वक्तव्य जारी गर्दै शोक व्यक्त गरिएको हो ।
नेपालीको जन्ती सवार गाडीले ठक्कर दिँदा असामयिक निधन भएको भन्दै वक्तव्यमा उहाँप्रति श्रद्धाञ्जली तथा शोकसन्तप्त परिवारप्रति समवेदना व्यक्त गरिएको छ ।
यसअघि मल्लरानी गाउँपालिकाले स्मृतिशेष नेपालीको शोकमा पुस १ गते आइतबार राष्ट्रिय झन्डा आधा झुकाउने तथा सो दिन बिदा दिने निर्णय गरिसकेको छ ।
मङ्सिर २८ गते बिहीबार प्युठानको बरौलाबाट बुढिचौरतर्फ गइरहेको जन्ती बोकेको स्कार्पियो जिप अनियन्त्रित हुँदा नेपालीको निधन भएको थियो । घटनामा पाँच जना घाइते भएका थिए । तीमध्ये कतिपयको करङ र खुट्टा भाचिएको बताइएको छ । उनीहरूको जिल्ला अस्पताल बिजुवार र बुटवलमा उपचार भइरहेको छ ।
