भीमदत्तनगर । दुई दसकदेखिको जग्गा अंशसम्बन्धी विवाद दुई दिनमै मिलापत्र भएपछि शुक्लाफाँटा नगरपालिका–१२ देखतभुली अग्लिपट्टीका इतवरिया राना निकै खुसी हुनुभएको छ ।

नगरपालिकाको न्यायिक समितिले उहाँको उजुरी आएको दुई दिनमै अंश पाउने गरी विवादको टुङ्गो लगाइदिएको थियो ।

झन्डै तीस वर्षअघि राना परिवार बस्दै आएको दुई बिघा दर्ता भएको जग्गा र तीन बिघा ऐलानी जग्गा दोदा नदीले कटान गरी बगाएको थियो ।

‘जग्गा कटान भएको दुई दसकपछि नदीले बहाव परिवर्तन गर्दै जग्गा भएर बग्न छाडेपछि चार जना बुबाको अंश लाग्ने जग्गामा तीन जना बुबाका छोराहरूले खेती गर्न थालेका थिए’ रानाले भन्नुभयो– ‘मैले अंश माग्न खोज्दा गालिगलौज र कुटपिट गर्न आउन थाले । त्यसपछि अंशकै लागि नगरपालिकाको न्यायिक समितिलाई गुहारेँ ।’

दुवै पक्षलाई सँगै राखेर न्यायिक समितिको इजलासमा छलफल बहस भयो । विगतका कटुतालाई विर्षदै चारओटै बुबाका छोरा बन्धा, सन्धा, सुकराम बसेर अंश दिने सहमति गरेको इतवरियाले बताउनुभयो ।

‘वर्षौँदेखि आफ्ना दाजुभाइसँग जग्गाकै लागि बोलिचाली बन्द गरेका थियौँ’ उहाँले भन्नुभयो– ‘न्यायपालिकाको पहलमा भाइहरूसँगको सम्बन्ध स्थापित भएको छ । अंशबाट वञ्चित थिए, त्यो पनि पाएँ ।’

भोगचलन गर्दै आएको ऐलानी जग्गाबाट छ कठ्ठामा भोगचलन गर्न दिने गरी सहमति गरिएको नगरपालिकाको न्यायिक शाखाका कर्मचारी सुरेन्द्रप्रसाद भट्टले बताउनुभयो ।

‘रानाबन्धुको वर्षौंदेखिको जग्गा विवाद रहेको थियो’ उहाँले भन्नुभयो– ‘पक्ष विपक्षलाई सँगै राखेर उजुरी आएको दुई दिनमै छलफल गरी सौहार्द रूपमा विवाद टुङग्याएका छौँ ।’

वडाध्यक्ष, न्यायिक समितिका संयोजक, जग्गा नापजाँच गर्ने अमिनको रोहबरमा फिल्डमा गएर जग्गा बाँडफाँड गरिने भएको उहाँको भनाइ छ ।

स्थानीय सरकार सञ्चालन ऐन–२०७४ को दफा ४७ अनुसार न्यायिक समितिको अधिकार क्षेत्रभित्र पर्ने भएकाले आइन्दा दुवै पक्षले मिलेर बस्ने, एकार्कालाई गालिबेइज्जती नगर्ने सम्बन्धमा दुवै पक्षलाई न्यायिक समितिमा उपस्थित गराई छलफल गराई मिलापत्रसमेत गरिएको उहाँले उल्लेख गर्नुभयो ।

नगरपालिकाका न्यायिक समितिको संयोजक तथा उपप्रमुख कल्पना पन्तका अनुसार रानाका जस्तै न्यायिक समितिमा ज्याला मजदुरी, रकम लेनदेन, जग्गासम्बन्धी, अंश, बाटो, कुुलो, खानेपानी सम्बन्धिका २४ विवादमा चालु आवमा मिलापत्र गरिएको छ ।

दुई विवादका उजुरी विचाराधीन अवस्थामा रहेका छन् । न्यायपालिकामा छओटा नयाँ विवाद दर्ता भएका छन् ।

दुई विवाद गत वर्षबाट सरिआएको उहाँको भनाइ छ । न्यायपालिकामा आएका सबै विवादको पक्ष विपक्षलाई सँगै राखेर ‘जित जित’ को भावना राखेर मिलापत्र गराइँदै आएको नगर उपप्रमुख पन्तको भनाइ छ । (रासस)