काठमाडौँ । सशस्त्र प्रहरी बल नेपालले नेपाल–भारत सीमास्तम्भको मर्मत तथा रङरोगन सुरु गरेको छ ।
मर्मतको सुरुआत २०८० कात्तिक १६ गते बिहीबार मधेस प्रदेशस्थित सशस्त्र प्रहरी बल नेपाल नं. २ छिन्नमस्ता बाहिनीका बाहिनीपति सशस्त्र प्रहरी नायव महानिरीक्षक दीपेन्द्र शाहको उपस्थितीमा धनुषास्थित नेपाल–भारत दसगजामा रहेको सीमास्तम्भबाट गरिएको हो ।
सीमास्तम्भ मर्मतको सुरुआत गर्दै नायव महानिरीक्षक शाहले दुरुस्त अवस्थाको सीमास्तम्भले सीमा सुरक्षाको जिम्मेवारीप्राप्त सशस्त्र प्रहरीलाई थप प्रभावकारी रूपमा सीमाको सुरक्षा गर्न सहज हुने र यसले सीमाको सुरक्षा मात्र नभई सीमा अपराध नियन्त्रण गर्नका साथै दुई देशबिचको सम्बन्ध थप मजबुत बनाउन योगदान पुर्याउनेसमेत बताए ।
उनले नेपाल सरकारबाट सशस्त्र प्रहरीलाई मर्मत कार्यको जिम्मेवारी प्राप्त भइसकेकाले आगामी दिनमा निरन्तर मर्मत कार्य सुचार रहने र मर्मतका क्रममा स्थानीय जनसमुदाय तथा जनप्रतिनिधिको सहयोग अपरिहार्य रहेकोसमेत बताए ।
उनले सशस्त्र प्रहरीले सीमावर्ती क्षेत्रका नागरिकको सहयोगबिना प्रभावकारी रूपमा सीमा सुरक्षा तथा सीमा अपराध नियन्त्रण गर्न असम्भव रहेको महसुस गरी सीमाबासीसंग सशस्त्र प्रहरी कार्यक्रम सुरु गरिसकेको र सोहीअन्तर्गत गत कात्तिक १ गते छिन्नमस्ता बाहिनी महोत्तरीमा मधेस प्रदेशको भारतसँग जोडिएका एक सय ४३ वडाका अधिकांश वडाअध्यक्षसँग अन्तरक्रिया कार्यक्रम आयोजना गरिएको र उक्त अवसरमा प्राप्त सुझावलाई कार्यान्वयन गर्ने चरणमा रहेकोसमेत जानकारी गराएका थिए ।
नेपाल भारत “बाउन्ड्री वर्किङ गु्रप (बिडब्लुजी)’ को पाचौँ बैठकमा सन् २०१४ पश्चात् मर्मत तथा निर्माण भएका सीमास्तम्भमध्ये जोर नम्बरको सीमास्तम्भ भारतीय सशस्त्र सीमा बल (एसएसबी) ले र बिजोर नम्बरको सीमास्तम्भ नेपालले मर्मत सम्भार गर्ने निर्णय भएको थियो ।
मन्त्रिपरिषद्को २०७७ साउन १९ गतेको निर्णयअनुसार सन् २०१४ पश्चात् मर्मत तथा निर्माण भएका बिजोर सीमस्तम्भ सशस्त्र प्रहरीलाई मर्मत सम्भार गर्ने जिम्मेवारी प्राप्त भएबमोजिम मर्मतको कार्य सुरु गरिएको हो । पहिलो चरणमा मधेस प्रदेशमा रहेका एक हजार भन्दा बढी सीमास्तम्भको मर्मत हुने छन् ।
कार्यक्रममा धनुषास्थित नगराइन नगरपालिकाका प्रमुख विनयकुमार यादव, मुखियापट्टी मुसहरनिया गाउँपालिकाका अध्यक्ष जयकुमार यादव, भारतीय सशस्त्र सीमा बलका डेपुटी कमान्डेन्ट सन्तोषकुमार निमोरिया, नापी विभागका अधिकृतलगायत जिल्ला प्रशासन कार्यालयका प्रतिनिधि तथा स्थानीय भद्रभलादमीको उपस्थिति रहेको थियो ।
त्यसैगरी, आजैबाट मधेस प्रदेशका सिरहा, महोत्तरी, सर्लाही, बारा र पर्सा जिल्लामा समेत सीमास्तम्भको मर्मत सुरु गरिएको छ ।
