काठमाडौं । राष्ट्रिय खेलकुद परिषद् (राखेप) ले तत्कालका लागि १ हप्ताका खेलकुदसँग सम्बन्धित सबै गतिविधि एक हप्ताका लागि स्थगित गरेको छ । कोरोना संक्रमणबाट बच्न खेलकुदका कुनै पनि गतिविधि नगर्न पनि राखेपले आग्रह गरेको छ ।
परिषद्का सदस्य सचिव रमेश कुमार शिलवालको अध्यक्षतामा मंगलबार बसेको बैठकले १ हप्ताका लागि खेलकुदसँग सम्वन्धित कुनै पनि प्रतियोगिता, प्रशिक्षण, सभा, सम्मेलन, गोष्ठी, सेमिनारलगायत मानवीय भेला हुने सम्पूर्ण गतिबिधि तत्काललाई एक हप्ताका लागि बन्द गर्ने निर्णय गरेको हो ।
बैठकले तत्काललाई एक हप्ताका लागि सम्पूर्ण खेल गतिबिधि बन्द गर्ने र त्यस पश्चात परिस्थिती हेरेर निर्णय गरिने जनाएको छ। साथै खेलाडी, प्रशिक्षक, खेल पदाधिकारी, कर्मचारीहरु, खेलसँग सम्वन्धित ब्यक्तिहरु र आम जनमानसलाई पनि सचेतना अपनाउन परिषदले आव्हान गरेको छ।
बी डिभिजन लिग स्थगित
यस्तै, कोरोना भाइरसका कारण काठमाडौमा भएको बी डिभिजन लिग फुटबल प्रतियोगिता स्थगित गरेको अखिल नेपाल फुटबल संघ एन्फाले विज्ञप्ती मार्फत जनाएको छ । राष्ट्रिय खेलकुद परिषदले खेलकुदका सबै गतिविधि चैत १२ सम्म स्थगित गर्ने निर्णय गरेसँगै बी डिविजन लिग पनि स्थगित भएको हो ।
एन्फाले एन्फा टेक्निकल सेन्टर धरान र बुटबल सहित सातदोबाटोको एकेडेमी र एन्फा सचिवालय समेत बन्द गरेको छ । यस्तै संघको पूर्व निर्धा्रित कार्यक्रम अनुसार आगामी १६ गते हुने संघको १९ औं एन्फा कंग्रेस बैठक (वार्षिक साधारण सभा)समेत अर्को सुचना जारी नहुँदासम्मको लागि स्थगित गरेको छ । कोरोना त्रासका कारण बैठकमा फिफा र एफसीका प्रतिनिधिहरु समेत उपस्थित नहुने भएपछि कार्यक्रम स्थगित गरेको एन्फाले जनाएको हो ।
