काठमाडौं । अन्ततः लामो प्रतिक्षापछि द्वन्द्वग्रस्त इजरायलबाट २५३ जना नेपाली स्वदेश फर्किएका छन् ।
इजरायलको तेलअबिब विमानस्थदबाट २५३ जना नेपाली लिएर नेपाल एयरलाइन्सको जहाज स्थानीय समयअनुसार दिउँसो १ बजेर १० मिनेट जाँदा दुबईका लागि उडेको छ। उक्त जहाज दुबईबाट काठमाडौँमा राति ९ बजे अवतरण गर्ने बताइएको छ।
यसअघि नेपाल फर्किन लागेका नेपालीहरू नेपाल एयरलाइन्सको जहाज चढ्न तेलअबिब एयरपोर्टमा भेला भएका थिए । इजरायलमा रहेका नेपाली लिन नेपाल एयरलाइन्सको वाइडबडी जहाज तेलअबिबमा पुगेको हो ।
हमासको आक्रमणपछि हिंसाग्रस्त इजरायलमा रहेका नेपालीको उद्धार गर्न आज बिहान नेपाल एयरलाइन्सको जहाज लिएर परराष्ट्रमन्त्रीसहितको टोली त्यहाँ पुगेको थियो ।
नेपाल फर्किन चाहनेको सूचीमा नाम लेखाएका ३५० जना नेपालीमध्ये अहिले पहिलो चरणमा २५० जनालाई जाहाजले स्वदेश लिएर आएको परराष्ट्र मन्त्रालयले जनाएको छ । बाँकीलाई पछि व्यवसायिक उडानमार्फत ल्याइने परराष्ट्र मन्त्रालयको भनाइ छ।
हमासको हमलामा परी इजरायलमा १० नेपाली विद्यार्थीको मृत्यु भएपछि सरकारले त्यहाँ रहेका अन्य नेपालीको उद्धार गरेको हो । घटनामा एक नेपाली विद्यार्थी बेपत्ता भएका छन् । उनको खोजी जारी रहेको परराष्ट्रले जनाएको छ ।
आक्रमणमा परी ७ जना नेपाली विद्यार्थी घाइते भएका छन् ।
इजरायली र प्यालेस्टाइनी समूहबीचको संघर्षमा गाँजा क्षेत्रमा अहिलेसम्म २४ सय बढीले ज्यान गुमाइसकेका छन् ।
