काठमाडौं । इजरायलमा विद्रोही समूह हमासको आक्रमणमा परी घाइते भएका मध्ये दुई जना विद्यार्थी डिस्चार्ज भएका छन्। बुधबार मन्त्रालयमा पत्रकार सम्मेलन गरी मन्त्रालयका प्रवक्ता सेवा लम्सालले सो जानकारी दिएकी हुन्।
प्रवक्ता लम्सालका अनुसार विद्यार्थीहरुलाई लिन आज २५० सिट क्षमताको वाइडबडी जहाज आज त्यतातर्फ जाँदैछ।
विद्यार्थीलाई प्राथमिकता दिएर पहिले स्वदेश फर्काउने लम्सालले बताइन्। इजरायलमा २२५ जना विद्यार्थी रहेको पनि लम्सालले पत्रकार सम्मेलनमा बताइन्।
३५० जना नेपाली दूतावासको सम्पर्कमा, २८८ स्वदेश फर्कन इच्छुक
इजरायलमा रहेका ३५० जना नेपाली त्यहाँस्थित नेपाली राजदूतावासको सम्पर्कमा आएका छन्।
पत्रकार सम्मेलनमा प्रवक्ता लम्सालले भनिन्, ‘इजरायलमा रहेका मध्ये ३५० जनाले अनलाइन फारम भर्नुभएको छ’ त्यसमध्ये २८८ जना स्वदेश फर्कन इच्छुक हुनुहुन्छ। उहाँहरुलाई लिन आजै राति २५० जना क्षमताको वाइडबडी जहाज त्यसतर्फ जाँदैछ।’
उनले प्राथमिकताका आधारमा विद्यार्थीलाई पहिला ल्याउने र बाँकी नियमित उडानमार्फत फर्कन चाहनेलाई दूतावासले सहयोग गर्ने बताइन्।
उनले कामको लागि इजरायल पुगेका नेपालीहरुबारे भने उपयुक्त समयमा सरकारले निर्णय गर्ने बताइन्।
शव ल्याउन इजरायल सरकारसँग आग्रह गरेका छौँ
इजरायलमा प्यालेस्टाइनी विद्रोहीको आक्रमणबाट मारिएका नेपालीको शव ल्याउन प्रक्रिया सुरु गरिएको परराष्ट्र मन्त्रालयले जनाएको छ ।
प्रवक्ता सेवा लम्सालले मृत्यु भएका नेपालीको शव हस्तान्तरणका लागि इजरायल सरकारलाई अनुरोध गरिएको बताइन्। तर इजरायल सरकारलाई दबाब नै दिनुपर्ने अवस्था चाहिँ नभएको उनले बताइन्।
‘शव ल्याउने प्रक्रिया बेग्लै हुन्छ। हामीलाई इजरायल सरकारले शव हस्तान्तरण गर्नुपर्छ’ उनले भनिन्, ‘त्यसका लागि इजरायल सरकारसँग हामीले अनुरोध गरेका छौँ।’
शनिबार गाँजा क्षेत्रमा प्यालेस्टाइनी विद्रोहीले गरेको आक्रमणका क्रममा १० जना विद्यार्थीको निधन भएको थियो।
बेपत्ता विद्यार्थीको खोजी जारी छ, अहिले सबै कुरा भन्न मिल्दैन
परराष्ट्र मन्त्रालयले इजरायलमा बेपत्ता नेपाली विद्यार्थीको खोजी जारी रहेको बताएको छ ।
बेपत्ताको खोजीबारे सञ्चारकर्मीको जिज्ञासामा प्रवक्ता लम्सालले त्यहाँ विभिन्न माध्यमबाट ती विद्यार्थीको खोजी गरिरहेको र अहिले नै सबै कुरा भन्न नमिल्ने बताइन्।
गएको शनिबार गाँजा क्षेत्रमा प्यालेस्टाइनी विद्रोहीले गरेको आक्रमणका क्रममा सुदूरपश्चिम विश्वविद्यालयका विद्यार्थी विपिन सम्पर्कविहीन भएका छन्। घटनामा १० जना विद्यार्थीले ज्यान गुमाएका थिए।
नेपाली राजदूत पनि बंकरमा बसेर काम गर्नुभएको छ
त्यस्तै, त्यहाँस्थित नेपाली राजदूत लगायत कर्मचारी पनि बंकरमा बसेर काम गरिरहेको प्रवक्ता लम्सालले बताइन्। युद्ध भएकोले बाहिर निस्किने स्वीकृति नभएको जानकारी आएको पनि उनले बताइन्।
