काठमाडौँ । आरोहणको विश्व कीर्तिमान बनाएका नेपाली आरोही तेन्जेन लामाको निधन भएको छ ।
चीनमा सिसापाङ्मा हिमालमा २०८० असोज २० गते शनिबार आएको हिमपहिरोमा परी उनको निधन भएको हो ।
दुई महिनाअघि तेन्जेनले आरोहणमा विश्व रेकर्ड बनाएका थिए ।
गत साउन ११ गते बिहान ११ बजेर ४५ मिनेटमा पाकिस्तानमा रहेको विश्वको दोस्रो अग्लो शिखर माउन्ट केटुको आरोहण गरेर सङ्खुवासभा, ठाँगेका तेन्जेन लामा र नर्वेजियन पर्वातारोही क्रिस्टिन हरिलाले ८ हजार मिटर अग्ला १४ हिमाल ९२ दिनमै चढेर विश्व कीर्तिमान बनाए ।
त्यसअघि उक्त कीर्तिमान निर्मल पुर्जा मगर उर्फ ‘निम्स दाइ’ को नाममा थियो । पुर्जाले छ महिना छ दिन लगाएर सो रेकर्ड बनाएका थिए तर तेन्जेनले पुर्जाको रेकर्ड ९२ दिनमै अर्थात् आधा समयमै तोडिदिए । उनको रेकर्डको विश्वभर चर्चा भयो ।
नयाँ रेकर्ड बनाएर नेपाल फर्किएपछि तेन्जेन केही समय आराम गर्न चाहन्थे । तीन महिनामा चौधओटा हिमाल चढ्नुपरेकाले उनको शरीरले आराम पाएको थिएन । त्यसैले परिवारका साथ केही समय थकान मेट्ने उनको योजना थियो तर यही बिचमा दुई जना अमेरिकी महिला पर्वातारोहीहरू एउटा कीर्तिमान बनाउने प्रस्ताव लिएर आए । उनीहरू चीनमा रहेको सिसापाङ्मा हिमाल चढेर विश्वका १४ अग्ला शिखर चढ्ने पहिलो अमेरिकी महिलाको कीर्तिमान बनाउन चाहन्थे र कीर्तिमान चुम्नका लागि त्यहीँ एउटा सिसापाङ्मा मात्र बाँकी थियो । त्यसका लागि उनीहरूलाई नेपाली गाइडरहरूको सहायता चाहिएको थियो ।
सोही अभियानमा जाने क्रममा उनको दुखद निधन भएको छ ।
तेन्जेनका पत्नी र दुई जना छोराहरू छन् ।
