काठमाडौँ । राष्ट्रिय जनमोर्चाले नेपालगञ्जमा घटिरहेको साम्प्रदायिक दङ्गाप्रति उच्च सतर्कता अपनाउन अपिल गरेको छ ।
केन्द्रीय उपाध्यक्ष तथा प्रवक्ता दुर्गा पौडेलको हस्ताक्षरमा २०८० असोज १७ गते बुधबार जारी प्रेसवक्तव्यमा राजमोले यस्तो धारणा व्यक्त गरेको हो ।
भारतका आएका राष्ट्रिय स्वयम्सेवक सङ्घका कार्यकर्ताले साम्प्रदायिक सद्भाव बिथोल्ने प्रयास गरेको भन्दै राजमोले नेपालगञ्ज घटनालाई विशुद्ध स्थानीय घटना नमान्न आग्रह गरेको छ ।
यस्तो छ, प्रेसवत्तव्ययको पूर्ण पाठ :
“नेपालगञ्जमा घटिरहेको साम्प्रदायिक दङ्गाप्रति राष्ट्रिय जनमोर्चाको गम्भीर ध्यानाकर्षित भएको छ ।
हामीले पहिले कोशी प्रदेशमा जातीय पहिचानको आन्दोलन र इसाईको गतिविधि बढेपछि त्यसले सम्पूर्ण देशमा असर पार्ने सम्भावनाप्रति चिन्ता प्रकट गरेका थियौँ । त्यहाँको तनावपूर्ण स्थितिलाई राजावादीले देशव्यापी रूपमा साम्प्रदायिक रूप दिने प्रयत्न गरे । भारतबाट आएका राष्ट्रिय स्वयम्सेवकका कार्यकर्ताले पनि नेपालमा साम्प्रदायिकता बढाउने काम गरे । भारतबाट आएका राष्ट्रिय स्वयम्सेवकका सदस्यले नेपालमा मुसलमान विरोधी भावना पनि फैलाउने काम गरे । ती सबैको परिणामस्वरूप तराईका धेरै जिल्लामा साम्प्रदायिक तनाव र दङ्गा बढ्दै गए । ती सबैको परिणामस्वरूप नै नेपालगञ्जमा पनि अप्रिय स्थिति उत्पन्न भयो ।
नेपालगञ्जको साम्प्रदायिक स्थितिलाई स्थानीय घटनाका रूपमा मात्र लिनु सही हुने छैन । त्यो सुनियोजित देशी र विदेशी राजनीतिक षड्यन्त्रको परिणाम हो र त्यसका देशको राष्ट्रियता, अखण्डता, धर्मनिरपेक्षता तथा शान्ति सुरक्षामा समेत गम्भीर दुष्परिणाम हुन सक्दछन् । त्यसैले हामीले त्यस प्रकारका गतिविधिका विरुद्ध उच्च प्रकारको सतर्कता अपनाउन हामीले सम्पूर्ण जनतासित अपिल गर्दछौँ ।”
