काठमाडौँ । प्रगतिशील पत्रकार सङ्घ, नेपालले सत्रौँ स्थापना दिवस मनाउने भएको छ ।
आगामी मङ्सिर २२ गते लुम्बिनी प्रदेशमा सत्रौँ स्थापना दिवस मनाउन थालिएको जानकारी दिइएको हो ।
२०८० असोज १२ गते काठमाडौँमा बसेको सचिवालय बैठकले सो निर्णय गरेको अध्यक्ष श्यामलाल पोखरेलद्वारा असोज १३ शनिबार जारी प्रेसविज्ञप्तिमा उल्लेख छ ।
प्रेसविज्ञप्तिमा असोज १२ गतेको “संविधान र प्रेस स्वतन्त्रता” विषय अन्तरक्रिया कार्यक्रम सफल भएको, सो कार्यक्रमलाई प्रदेश र जिल्ला समितिसम्म विस्तार गर्ने, स्थापना दिवसको अवसरमा मङ्सिर २२ गते नै केन्द्रीय समितिको बैठक पनि बस्ने जानकारी गराइएको छ ।
यस्तो छ, प्रेसविज्ञप्तिको पूर्ण पाठ :
“प्रगतिशील पत्रकार सङ्घ, नेपालको केन्द्रीय सचिवालय बैठक उपलब्ध केन्द्रीय समितिका साथीहरूसहित २०८० असोज १२ गते शुक्रबार काठमाडौँमा बस्यो । बैठकले लिएका निर्णयहरू सार्वजनिक गर्न यो प्रेसविज्ञप्ति जारी गरिएको छ ।
१. २०८० असोज १२ गते शुक्रबार काठमाडौँमा आयोजित “संविधान र प्रेस स्वतन्त्रता” विषयक अन्तरक्रिया कार्यक्रमको मूल्याङ्कन गरियो । समग्र मूल्याङ्कनमा सो कार्यक्रम सफल भएको महसुस गरियो । कार्यक्रमलाई सफल पार्न जुट्नु हुने सबै समिति, सदस्य, अतिथि र सहभागी सबैलाई धन्यवाद ज्ञापन गरियो ।
२. प्रस्तुत “संविधान र प्रेस स्वतन्त्रता” विषयमा प्रदेश समिति वा जिल्ला समितिहरूले पनि कार्यक्रम गर्ने निर्णय भएको छ । त्यसका लागि सम्बन्धित प्रदेश समिति वा जिल्ला समितिहरूले कार्यक्रमको व्यवस्थापन गर्ने छन् ।
३. गत २०६४ मङ्सिर २२ गते दाङको भालुबाङमा प्रगतिशील पत्रकार सङ्घको स्थापना भएको थियो । आगामी २०८० मङ्सिर २२ गते शुक्रबार यस सङ्गठनले स्थापनाको सोह्रौँ वर्ष पूरा गरी सत्रौँ वर्षमा प्रवेश गर्दै छ । यस अवसरमा लुम्बिनी प्रदेशमा केन्द्रीय कार्यक्रमअनुसार सङ्गठनको सत्रौँ स्थापना दिवस मनाइने छ । त्यससम्बन्धी आवश्यक निर्णय सचिवालयले गर्ने छ ।
४. २०८० मङ्सिर २२ गतेको स्थापना दिवसकै दिन केन्द्रीय समितिको पनि बैठक बस्ने निर्णय भएको छ ।”
