धनवीर पुनमगर, नयाँदिल्ली ।
नवलपुर जिल्ला, मध्यविन्दु नगरपालिका–४ सुन्दरीनगरमा बस्दै आउनुभएका लालबहादुर क्षेत्रीप्रति मूल प्रवाह अखिल भारत नेपाली एकता समाजले श्रद्धाञ्जली व्यक्त गरेको छ ।
समाजको केन्द्रीय सदस्यसमेत रहनुभएका क्षेत्रीको २०८० भदौ २७ गते निधन भएपछि समाजले श्रद्धाञ्जली तथा शोकसन्तप्त परिवारप्रति व्यक्त गरेको हो ।
अध्यक्ष ठाकुर खनालको हस्ताक्षरमा भदौ २९ गते शुक्रबार शोकवक्तव्य जारी गर्दै समाजले उहाँको मृत्युबाट सङ्गठन र आन्दोलनलाई अपूरणीय क्षति पुगेको उल्लेख गरिएको छ ।
शोकवक्तव्यमा भनिएको छ :
“मूल प्रवाह अखिल भारत नेपाली एकता समाजका केन्द्रीय सदस्य भई हाल मध्यविन्दु नगरपालिका वडा नम्बर ४ सुन्दरीनगर नवलपरासी निवासी लालबहादुर क्षेत्री ६७ वर्षको उमेरमा २०८० भदौ २७ गते ९तदनुसार १३ सेप्टेम्बर २०२३० हृदयघातबाट मृत्यु भएको छ । उहाँको मृत्युप्रति गहिरो दुस्ख व्यक्त गर्दै हामीले सन्तप्त परिवारजनप्रति समवेदना प्रकट गर्दछौँ ।
हाम्रो सङ्गठनको इमान्दार, जुझारु र कर्तव्यनिष्ठ सदस्य हुनुहुन्थ्यो । मूल प्रवाह अखिल भारत नेपाली एकता समाज, मध्यउत्तर क्षेत्रीय समितिको उपाध्यक्षको जिम्मेवारीमा कार्यरत हुनुहुन्थ्यो । त्यसरी उहाँको मृत्युबाट हाम्रो सङ्गठनको आन्दोलनमा अपूरणीय क्षति पुगेको छ ।
अन्तमा हामीले उहाँप्रति हार्दिक श्रद्धाञ्जली व्यक्त गर्दछौँ ।”
उहाँको आज भदौ २९ गते मध्यविन्दु नगरपालिकामा नै दाहसंस्कार हुँदै छ । मूल प्रवाहको केन्द्रीय कार्यालयले जनाएअनुसार दाहसंस्कारका लागि उहाँका दुई छोराहरू भारतबाट नेपाल फर्किसक्नुभएको छ ।
क्षेत्री भारत मध्यप्रदेशको राजधानी भोपालका जागिर गर्नुहुन्थ्यो । उहाँले लामो समयदेखि मूल प्रवाह अखिल भारत नेपाली एकता समाजमा रहेर कर्तव्य वहन गर्दै आउनुभएको थियो ।
