काठमाडौँ । राष्ट्रिय जनमोर्चाले प्रतिनिधिसभाका सांसद तथा संविधानसभाका अध्यक्ष सुभाषचन्द्र नेम्वाङको निधनप्रति श्रद्धाञ्जली व्यक्त गरेको छ ।
अध्यक्ष चित्रबहादुर केसीको हस्ताक्षरमा २०८० भदौ २६ गते मङ्गबार जारी शोकवक्तव्यमा नेम्वाङप्रति श्रद्धाञ्जलीका साथै शोकसन्तप्त परिवारप्रति समवेदना व्यक्त गरिएको हो ।
संविधान र कानुनमार्फत देशलाई गणतन्त्रात्मक प्रणालीतर्फ लैजान नेम्वाङको योगदान भएको उक्त प्रेसवक्तव्यमा उल्लेख छ ।
शोकवक्तव्यमा अगाडि भनिएको छ :
“प्रतिनिधिसभाका सांसद तथा संविधानसभाका अध्यक्ष का. सुभाषचन्द्र नेम्वाङको हृदयघातका कारण मृत्यु भएको खबरले मलाई र हाम्रो दल राष्ट्रिय जनमोर्चालाई स्तब्ध बनाउनुका साथै दु:खी तुल्याएको छ ।
वर्तमान नेपालको संविधान २०७२ को निर्माणका लागि संविधानसभामा रहेका दलहरूबिच सहमति, सहकार्य तथा सामञ्जस्यता कायम गर्नका लागि का. सुभाषचन्द्र नेम्वाङले खेलेको भूमिका महत्त्वपूर्ण रहेको थियो । कानुनको क्षेत्रमा उहाँको गहन अध्ययन, बौद्धिक क्षमता तथा सामन्तवाद विरुद्धको ऐक्यबद्धताको परिणाम नै उहाँलाई संविधान निर्माणमा भूमिका खेल्न सम्भव भएको हो । मुलुकलाई गणतन्त्रात्मक प्रणालीसहितको नयाँ संविधान प्रदान गर्नमा का. सुभाषचन्द्र नेम्वाङले खेलेको भूमिकालाई देश र जनताले सम्झिरहने छन् ।
का. सुभाषचन्द्र नेम्वाङप्रति हार्दिक श्रद्धाञ्जली प्रदान गर्दै शोकसन्तप्त परिवारप्रति समवेदना प्रकट गर्दछौँ ।”
