काठमाडौं । काठमाडौंको चन्द्रागिरि नगरपालिका–९ मच्छेगाउँ थापाटोलमा चितुवाले आक्रमण गर्दा एकजना घाइते भएका छन् ।
घाइते हुनेमा चन्द्रागिरि नगरपालिका–९ मच्छेगाउँ थापाटोलका ४० वर्षीय कुनीप्रसाद तामाङ रहेका जिल्ला प्रहरी परिसर काठमाडौँका प्रवक्ता तथा प्रहरी उपरीक्षक कुमोध ढुङ्गेलले जानकारी दिए। उनका अनुसार तमाङले सञ्चालन गरेको कुखुरा फार्ममा चितुवा पसेर उनलाई आक्रमण गरेको हो ।
घाइते तामाङको उपचार भइरहेको छ । यसैगरी आक्रमण गर्ने चितुवासमेत घाइते भएको प्रवक्ता तथा प्रहरी उपरीक्षक ढुङ्गेलले बताए।
रसुवाको छोधोङ्मो गाउँपालिका– २ घर भएका तामाङले कीर्तिपुरमा जग्गा लिजमा लिएर कुखुरा फार्म सञ्चालन गर्दै आएका छन्।
कुखुरा खान खोरभित्र पसेको चितुवाले आफूमाथि आक्रमण गरेपछि आफूले पनि लाठीले हानेको उनले बताए । तामाङले चितुवालाई कुखुराको खोरभित्र थुनेका थिए ।
चितुवालाई काठमाडौँको हात्तीसारबाट गएको वनको प्राविधिक टोलीले डार्ट गरेर (लठ्ठिने सुई लगाएर) नियन्त्रणमा लिने तयारी गरेको छ ।
