काठमाडौं । लामो समयदेखि माइतीघर मण्डलामा धर्ना दिइरहेका सहकारीपीडितले काठमाडौंँमा विशाल प्रदर्शन गरेका छन् ।
२०८० साउन १८ गते बिहीबार माइतीघरदेखि बानेश्वरसम्म प्रदर्शन गरेका उनीहरूले सहकारी संस्थामा आफूले वचत गरेको रकम फिर्ता पाउनुपर्ने माग गरेका हुन् ।
वचतकर्ताको प्रदर्शन बिजुलीबजारनेर पुग्दा प्रहरीले हस्तक्षेप गरेको थियो । नयाँबानेश्वर एभरेस्ट होटलअगाडि प्रहरीले सडकमा बार लगाएर निषेधित क्षेत्रमा प्रदर्शन गर्न रोकेको थियो । त्यस क्रममा प्रहरीसँग केहीबेर धकेलाधकेल पनि भएको थियो ।
उनीहरूले आफ्नो वचत रकम ब्याजसहित फिर्ता पाउनुपर्ने, सहकारीपीडितलाई राज्यकोषबाट रकम फिर्ता गर्नुपर्नेलगायतका माग राखेका थिए ।
यता, प्रहरीले सहकारीपीडितमध्ये केहीलाई छलफलका लागि नयाँबानेश्वरस्थित सहकारी विभाग लगेको थियो ।
जिल्ला प्रहरी परिसर काठमाडौँका प्रहरी उपरीक्षक कुमोद ढुङ्गेलले छलफलका लागि केही मानिसलाई सहकारी विभाग लगिएको जानकारी दिए ।
‘कसैलाई कुटपिट र पक्राउ गरेका छैनौँ’ उनले भने ।
