काठमाडौँ । बञ्चरेडाँडाका स्थानीयले ल्यान्डफिल्ड साइटमा आज पनि फोहोर फाल्न अवरोध गरेका छन् ।
स्थानीयको अवरोधका कारण काठमाडौँ महानगरबाट फोहोर बोकेको कुनैपनि गाडी ल्यान्डफिल्ड साइट नगएको फोहोर मैला व्यवस्थापन संघले जनाएको छ ।
सर्वोच्च अदालतले बञ्चरेडाँडामा फोहोर विसर्जन गर्न जाने टिपरसँग शुल्क उठाउने र नदिए अवरोध गर्ने स्थानीय तहको निर्णय कार्यान्वयन नगर्न अन्तरिम आदेश दिएको थियो । तर, आदेशको अवज्ञा गर्दै स्थानीयले फोहोर बोकेर जाने गाडीमा अवरोध गरेका हुन् ।
बञ्चरेडाँडा र सिसडोलका स्थानीयहरुले विगतमा भएका सहमति कार्यान्वयन नभएको भन्दै नयाँ आर्थिक वर्ष सुरु भएकै दिन सोमबारदेखि फोहोर बोकेर ल्यान्डफिल साइट गएका गाडीहररूलाई बाटोमै रोकेका थिए ।
बञ्चरेडाँडा र सिसडोलका स्थानीयले फोहोर विसर्जन गर्न अवरोध गरेपछि फोहोर मैला व्यवस्थापन संघले अदालतमा रिट दर्ता गरेको थियो ।
नुवाकोटको ककनी गाउँपालिका–३ का वडाध्यक्ष घननाथ बजगाईंले फोहोर फाल्ने स्थान र मानव बस्तीहरु छुट्याउनुपर्ने आफूहरूको माग रहेको बताए । ‘अदालतले गाउँपालिकालाई कर नउठाउन मात्रै आदेश दिएको हो,’ उनले भने, ‘हामी फोहोर फाल्न दिंदैनौं, यहाँ मान्छेको जीवनको सवाल छ ।’ उनले आफूहरूको माग पुरा नभएसम्म फोहोर विसर्जन गर्न नदिने बताए ।
संघका अनुसार सोमबार ३० वटा फोहोर बोकेका गाडी ल्याण्डफिल साइट जाँदा बाटोबाटै फर्केको थियो । तर, मंगलबार फोहोर बोकेको गाडी काठमाडौंबाट नै नगएको हो ।
काठमाडौं उपत्यकाबाट दैनिक फोहोर बोकेको करिब ३८० वटा ट्रक बञ्चरेडाँडा जाने महानगरले जनाएको छ ।
बञ्चरेडाँडा र सिसडोलका स्थानीयको अवरोध कारण बुधबारदेखि काठमाडौंको फोहोर नउठ्ने फोहोरमैला व्यवस्थापन संघले जनाएको छ ।
संघका सचिव मित्र घिमिरेका अनुसार सोमबार र मंगलबारको फोहोर टेकु ट्रान्सफर स्टेशन र गाडीमै राखिएको छ ।
जसका कारण बुधबारदेखि फोहोर उठाउन समस्या हुने भएको छ ।(रासस)
