काठमाडौँ । प्रतिनिधिसभाकै सांसदहरूले स्वीकारेका छन् : दलित समुदायमाथिको ज्यादतीलिे सीमा नाघ्यो ।
२०८० असार २९ गते शुक्रबार प्रतिनिधिसभाको बैठकमा बोल्दै सांसदहरूले यस्तो अभिव्यक्ति दिएका हुन् ।
अन्तरजातीय विवाहको निहुँमा जुम्लामा दलित समुदायका एक युवाको घरमै आगो लगाइदिएको घटनासमेतको बारेमा कुरा उठाउँदै सांसदहरू आक्रोशित भए ।
सांसदहरूले जुम्लामा भएको घटनाले दलित समुदायमाथि अहिले पनि जातीय भेद्भाव र छुवाछुतजन्य व्यवहार कायम रहेको र त्यस्ता भेदभावपूर्ण सोचकै कारण जघन्य प्रकृतिका अपराधहरू समेत कम नभएको जिकिर गरे ।
बैठकमा नेकपा (माओवादी–केन्द्र) का सांसद रणेन्द्र बरालीले दलित समुदायमाथि हुने ज्यादतिले सीमा नाघेको बताए ।
‘दलित समुदायमाथि ज्यादतिले सीमा नाघ्यो, अब त अति भयो’ उनले अघि भने– ‘जातीय भेद्भाव र छुवाछुतका एकपछि अर्को आपराधिक घटना दोहोरिएका छन् । सरकार समाजलाई यही अवस्थामा कहिलेसम्म राखिरहने हो ?’
उनले हालै जुम्लाको तातोपानी गाउँपालिका–४, गिडिखोलामा अन्तरजातीय विवाह गरेकै कारण मुकुन्द नेपालीको घरमा गरिएको आगलागनीको घटनादेखि प्रभात बसेल र अजित मिजारसम्मका घटनाको विवरण उल्लेख गर्दै दलितमाथि अहिले पनि जघन्य अपराधको शृङुखला नरोकिएको बताए ।
‘अहिले जुम्लामा जसरी आगलागी भयो, त्यस्तै अन्तरजातीय विवाह गरेकै कारण सात वर्षअघि काभ्रेका अजित मिजारको षड्यन्त्रपूर्ण हत्यो भयो । अहिले पनि हत्यारा खुलेआम हिँडिरहेका छन् तर अजितको लास उठेको छैन । उनको लास अहिले पनि अस्पतालमै कुहिरहेको छ’ सांसद बरालीले भने– ‘प्रेमविवाह गरेकै कारण अस्ति भर्खरै बागलुङका प्रभात बस्याललाई बलात्कार र अपहरणको मुद्दा लगाएको छ । यस्तो ज्यादति कहिलेसम्म रहिरहने ?’
उनले दलित समुदायमाथि भइरहेका विभेदपूर्ण व्यवहारको अन्त्य गर्न सरकारले सचेतनामूलक कार्यक्रम ल्याउनुपर्ने माग गरे ।
यसअघि, असार २६ गते राष्ट्रिय जनमोर्चाको तर्फबाट राष्ट्रियसभाका सांसद राजेश विश्वकर्मा (तुलप्रसाद) सोही मुद्दा उठाउनुभएको थियो ।
