काठमाडौँ । बैदेसिक रोजगारीमा गएका श्रमिकमार्फत सुन तस्करी गर्ने गिरोहका १२ जनालाई प्रहरीले पक्राउ गरेको छ ।
त्रिभुवन विमानस्थलबाट आइतबार र सोमबार दुई दिन उनीहरूलाई पक्राउ गरिएको प्रहरीले जनाएको हो ।
सोमबार उपत्यका अपराध अनुसन्धान कार्यालयले पत्रकार सम्मेलन गरी पक्राउ परेका गिरोहका १२ जनालाई सार्वजनिक गरेको छ ।
गैरकानुनी रूपमा सङ्गठित भई भन्सारछली गरी कतारबाट सुन चोरी पैठारी गरी नेपाल ल्याई खरिदबिक्रीको कारोबार गर्ने व्यक्तिको बारेमा अनुसन्धान गर्दा यही असार २४ गते नेपाल वायु सेवा निगमको आरए२४० नं. को फ्लाइटबाट कतार हुँदै बिहान १०:१० बजे त्रिभुवन अन्तर्राष्ट्रिय विमानस्थलमा साना साना परिमाणमा सुनका गरगहना ल्याउँदै गरेका उनीहरूलाई अपराध अनुसन्धान कार्यालयबाट खटिई गएको टोलीले सुनसहित पक्राउ गरेको हो ।
पक्राउ पर्नेमा धनुषाको मिथिला विहार नगरपालिका ५ ललियाका २५ वर्षीय सुनिलकुमार महरा, सिरहा नगरपालिका १७ पटेरवाका २४ वर्षीय दिनेशकुमार यादव, कपिलवस्तुको सुद्धोधन गाउँपालिका ६ बाझखोरका २३ वर्षीय सन्तुगुलाम मुराउ, धनुषाको धनुषाधाम नगरपालिका ५ नौसयविघाका ३४ वर्षीय नरेश पंजियार, बाँकेको राप्ती सोनारी गाउँपालिका ४ बैदापुरका ३६ वर्षीय भुमबहादुर वली रहेका छन्।
यसैगरी सप्तरी बलानबिहुल गाउँपालिका २ चनहीपथराहका २८ वर्षीय विनोदकुमार साह, विनोदकी पत्नी २५ वर्षीय सन्जुकुमारी साह, सप्तरीको बलानबिहुल गाउँपालिका ६ का २२ वर्षीय दुर्गाप्रसाद यादव, सप्तरीको वोदे वसाइन नगरपालिका १ का २८ वर्षीय देवानन्द साह, सिराहाको लहान नगरपालिका ४ कुमहालका शिवसुन्दर राउत, सिराहाको धनगढी नगरपालिका ३ हनुमाननगरका २३ वर्षीय मोहनकुमार यादव र सर्लाहीको फरहदवाका ५६ वर्षीय निमाइ साह रहेका छन्।
प्रहरीका अनुसार कतारको दोहामा बस्ने गिरोहले नेपाली कामदार घर फर्कने बेलामा उनीहरूलाई सम्पर्क गरी नेपाल पुग्दा होटलमा खानबस्न फ्री, घर जाने बेलामा मेरो मान्छेले पाँच हजार रुपैयाँ दिन्छ । सोबापत् तिमीहरूले ५० ग्राम सुन बिलसहित लिएर जाऊ । उक्त सुन कानुनबमोजिम लैजान पाइन्छ, काठमाडौँको एयरपोर्टमा पुगेपछि मेरो मान्छेले रिसिभ गरेर होटलमा लैजान्छ । तिमीले उक्त सुन दिनू भनी विश्वस्त पारी उनीहरूले लगाएको लुगासहित फोटो खिँची काठमाडौँमा विनोद साहलाई ह्वाट्सएपमार्फत पठाई दैनिक १५–२० जनालाई ५०–५० ग्रामको दरले पठाउने गरेका छन् भन्ने सूचना प्राप्त भएपछि प्रहरीले अनुसन्धान सुरु गरेको थियो।
सुन तस्करी गर्ने कार्यमा संलग्न रहेका विनोदकुमार साह र उनकी पत्नी रान्जुकुमारी साहले काठमाडौँको एयरपोर्टअगाडि होटल हिमालयन स्पायर नामको होटल सञ्चालन गरी काठमाडौँमा सुन सङ्कलन गरी बिक्री गरी रितेश जनरल स्टोरको खातामा रकम जम्मा गर्ने गरेको खुलेको छ ।
उक्त तस्करबाट आर्जित रकम रेमिटमार्फत् शिवसुन्दर राउतमार्फत् कतारमा पठाउने गरेको प्रहरीले सूचना प्राप्त गरेको जनाएको छ । प्रहरीका अनुसार उनीहरूले कुल रु २ अर्ब ३७ करोड ८२ लाख ३६ हजार ५४९ रुपैयाँको कारोबार गरेको देखिएको छ ।
