काठमाडौँ । असार २४ गते आइतबार दिउँसो १ बजे हुने भनिएको संसद् बैठक स्थगित हुनुका पछाडिको कारण प्रमुख प्रतिपक्षी एमालेले बोली फेर्नु भएको देखिएको छ ।
नेपाली काङ्ग्रेसका प्रमुख सचेतक रमेश लेखकका अनुसार आइतबार बिहानको तीन दलका नेताहरूमाझको बैठकले दिउसो १ बजेदेखि संसद् सुचारु गर्ने निर्णय गरे पनि एमालेको उपर्युक्त रवैयाका कारण सदन स्थगित भएको हो ।
‘प्रधानमन्त्रीले जवाफ दिने र संसद् खुलाउने सहमति भएको थियो’ उहाँले भन्नुभयो– ‘सदनमा आएपछि जवाफ सुन्ने र चित्त नबुझे अवरुद्ध हुन्छ भन्ने कुरा आयो । त्यसलाई हामीले एमालेले कुरा फेरेको रूपमा बुझ्यौँ र आजको बैठक बस्न सकेन ।’
प्रमुख सचेतक लेखकका अनुसार संसद् भवनमा पुगेपछि मात्रै एमालेले बोली फेरेको जानकारी आएको बताउनुभयो ।
त्यस्तै, नेकपा (माओवादी केन्द्र) का प्रमुख सचेतक हितराज पाण्डेले पनि एमालेका नेताहरूले ‘संसद्को अवरोध हटाउने सहमति भएको छैन है’ भन्ने सन्देश पठाएको दाबी गर्नुभयो ।
यी सबै घटनाक्रम माझ प्रधानमन्त्री पुष्पकमल दाहाल प्रचण्डले आफ्नो विवादास्पद अभिव्यक्तिबारे स्पष्टीकरण दिने भनिएको प्रतिनिधिसभा बैठक बस्दै नबसी भोलिका लागि सारिएको थियो ।
एक पुस्तक विमोचन कार्यक्रममा ‘आफूलाई प्रधानमन्त्री बनाउन सरदार प्रीतम सिंह पटक पटक दिल्ली गएको’ बताएपछि एमालेले प्रधानमन्त्रीको राजीनामा माग्दै संसद अवरुद्ध गर्दै आएको छ ।
सहमतिको प्रयासमा आइतबार बिहान प्रधानमन्त्री प्रचण्डले एमालेका अध्यक्ष केपी शर्मा ओली र नेपाली काङ्ग्रेसका सभापति शेरबहादुर देउवासँग छलफल गर्नुभएको थियो ।
सिंहदरबारमा भएको छलफलपछि काङ्ग्रेस र माओवादी नेताहरूले एमाले राजीनामाको मागबाट पछि हटेको र प्रधानमन्त्रीले जवाफ दिएपछि संसद्को अवरोध हट्ने जानकारी दिएका थिए ।
यता, एमाले नेताहरूले भने प्रधानमन्त्रीको स्पष्टीकरण सुन्ने र चित्तबुझ्दो जवाफ नआए फेरि संसद् अवरुद्ध हुन सक्ने बताउन थालेका थिए ।
यही विवादका माझ आजको संसद् बैठक बस्न सकेन र सूचना टाँसेर भोलि असार २५ गते सोमबारका लागि बैठक सारिएको संसद्मा महासचिव भरतराज गौतमले जानकारी दिनुभयो ।
यता, प्रमुख प्रतिपक्षी एमालेका सचिव योगेश भट्टराईले भने प्रधानमन्त्रीको जवाफ सुन्न संसद् पुगेका बेला प्रधानमन्त्रीकै आग्रहमा बैठक भोलिलाई सारिएको दाबी गर्नुभयो ।
उनले ट्विमार्फत् भन्नुभएको छ : ‘जवाफ तयार गर्नुअघि कतै सोध्नुपर्ने हो कि ? किन सारिएछ कुन्नि ?’
