वशन्त खड्का, अघाँखाँची ।
अखिल नेपाल युवक संघ, अर्घाखाँचीले प्रधानमन्त्री पुष्पकमल दाहाल प्रचण्डको अभिव्यक्तिविरुद्ध सिट्ठी फुकेर विरोध जनाएको छ ।
युवक संघले शुक्रबार सदरमुकाम सन्धिखर्कमा सिट्ठी जुलुश निकालेको हो ।
संघले प्रधानमन्त्री प्रचण्डको अभिव्यक्तिसँगै, संघीयताको खारेजी, भ्रष्टाचार र सामाजिक हिंसाको समेत विरोध गरेको छ ।
सन्धिखर्क मसाल बजारबाट सुरु भएको सिट्ठी जुलुस चुत्राबेसी, हललाइन, सन्धिखर्कका विभिन्न चोक परिक्रमा गर्दै शान्ति बगैंचामा पुगेर कोणसभामा परिणत भएको थियो । कोणसभालाई राष्ट्रिय जनमोर्चाका जिल्ला अध्यक्ष थम्मन केसी, नेकपा (मसाल)का जिल्ला प्रवक्ता पशुपति ढकाल र युवक संघका केन्द्रीय सचिव ठाकुर पन्थीले सम्बोधन गर्नुभएको थियो ।
बहालवाला प्रधानमन्त्री पुष्पकमल दाहालको अभिव्यक्तिले नेपालमा सरकार कसले बनाउँछ भन्ने कुरा स्पष्ट पारेको उहाँहरुको भनाई छ ।
प्रचण्डले आफूलाई प्रधानमन्त्री बनाउन सरदार प्रितम सिंह धेरै चोटी दिल्ली गएको कुरा सार्वजनिक गरेसँगै नेपालमा हुने सरकार गठन र विघटनमा भारतले खेल्ने भूमिका प्रष्ट पारेको उहाँहरुको जिकिर छ ।
व्यवस्था परिवर्तन भएपनि अवस्था नफेरिँदा देश र जनताको हितमा काम हुन नसकेको उहाँहरुको आरोप छ । सरकारले उठाएका भ्रष्टचारका फाइल गायब नगर्न सुझाव दिनुभएका नेताहकरुले टाट पल्टिएको अर्थतन्त्रलाई लयमा ल्याउन संघीयता खारेजीको विकल्प नभएको बताउनुभएको छ ।
अखिल नेपाल युवक संघका जिल्ला सचिव रेसम विक, सचिव पुरन नेपाली र अखिल (छैठौं)का जिल्ला अध्यक्ष जीवन नेपालीले सहजीकरण गर्नुभएको कोणसभामा राष्ट्रिय जनमोर्चाका नेता शेरबहादुर विसी,राष्ट्रिय जनमोर्चाका जिल्ला उपाध्यक्ष गोपाल पौडेल, सचिव बाबुराम पन्थी, भुपाल पुन लगायतको उपस्थिति रहेको थियो ।
