विराटनगर । सत्ता गठबन्धनले कोशी प्रदेश सरकारमा नेपाली काङ्ग्रेसलाई नेतृत्व दिने भएको छ ।
२०८० असार १८ गते सोमबार प्रधानमन्त्रीको सरकारी निवास बालुवाटारमा बसेको सत्ता गठबन्धनको बैठकले यस्तो निर्णय गरेको हो ।
बैठकपछि सञ्चारकर्मीसँग कुरा गर्दै नेकपा (एकीकृत समाजवादी) का कार्यवाहक अध्यक्ष राजेन्द्रप्रसाद पाण्डेले कोशी प्रदेशमा गठबन्धनबाट काङ्ग्रेस ठुलो दल भएकाले काङ्ग्रेसका संसदीय दलका नेता उद्धव थापालाई मुख्यमन्त्रीमा अघि सार्ने निर्णय गरेको बताउनु भयो ।
उहाँले भन्नुभयो– ‘कोशी प्रदेशमा सरकार गठनका लागि गठबन्धनमा भएका दलको तर्फबाट नेपाली काङ्ग्रेसका संसदीय दलका नेता उद्धव थापालाई मुख्यमन्त्रीको रूपमा अघि सार्ने सल्लाह दिएका छौँ ।’
उहाँले मुख्यमन्त्रीका लागि आवश्यक सांसदहरू खोज्ने जिम्मा पनि काङ्ग्रेसले नै लिनुपर्ने गरी सहमति भएको बताउनु भयो ।
‘अहिले गठबन्धनभित्र सबैभन्दा ठुलो सङ्ख्या काङ्ग्रेसको छ । त्यसैले काङ्ग्रेसलाई मुख्यमन्त्री दिने गरी बाँकी सिट सङ्ख्या पनि उहाँहरूलाई नै पुर्याउने जिम्मेवारी दिएका छौँ ।’
पाण्डेले जनमतलाई सरकारमा ल्याउने सहमति भएको पनि बताउनुभयो ।
