काठमाडौँ । नेकपा (एमाले) का प्रमुख सचेतक पदम गिरीले मिटरब्याजी प्रकरणमा राजनीतिक दलका ठुला नेता र प्रहरीका उच्च अधिकारीहरूको संलग्नता रहेको बताउनुभएको छ ।
२०८० असार १७ गते आइतबार प्रतिनिधि सभा बैठकमा “केही नेपाल ऐनलाई संशोधन गर्ने विधेयक–२०८०” को सम्बन्धमा छलफलमा भाग लिँदै उहाँले यस्तो अभिव्यक्ति दिनुभएको हो ।
‘मिटरब्याज प्रकरण धेरै गम्भीर विषय हो’ उहाँले भन्नुभयो– ‘राजनीतिक दलका ठुला नेताहरूको संरक्षणमा यी काम भएका छन् ।’
मन्तव्य राख्दै उहाँले सो प्रकरणमा राष्ट्रसेवक कर्मचारी र प्रहरीका उच्चपदस्थ कर्मचारी संलग्न रहेका पनि बताउनुभयो ।
उहाँले भन्नुभयो– ‘यसमा राष्ट्रसेवक, उच्चपदस्थ कर्मचारी संलग्न छन् । प्रहरीका उच्च अधिकारी संलग्न छन् ।’
नेता गिरीले सामन्तवादको अवशेषको रूपमा मिटरब्याज समस्या रहेको बताउँदै यसको विरुद्ध सशक्त ऐन बन्नुपर्ने बताउनुभयो ।
